Dımash jeńimpaz atandy

Táńirim qazaqqa bererin taýyspasyn. Bir Dımash Aspanasty eliniń mıllıardyn aýzyna qaratyp, halqynyń mereıin tasytyp jatsa, Qostanaıdyń Rýdnyı qalasynan taǵy bir Dımash án álemine qanat qaqty. 21 jastaǵy jigit «Evrazııa» 1» arnasynan kórsetiletin «Golos Kazahstana» jobasyna qatysyp, jeńimpaz atanyp, 7 mıllıon teńgeniń sertıfıkatyna ıe boldy. Onda ol Maıkl Djeksonnyń, Robertıno Lorettıdiń, Vla­dımır Presnıakovtyń repertýarynan ánder oryndap, kórermenin de, qatal synshy qazylar alqasyn da rıza etti. Onyń aldynda «H-faktor» jobasyna da qatysqan bolatyn. Onda tájirıbesi jetisińkiremese de, Dımash Dáýletovtiń erekshe daýysy úshin qazylar alqasynyń pikiri ekige jarylǵan bolatyn. Jobanyń aıaǵyna deıin jete almaǵany ánge ynty­zar jigittiń rýhyn jasyt­qan joq, qaıta armanyn asqaq­tata túsken sekildi boldy. Negizi, Dımashtyń esimi – Dinmuhamed. О́zbekstanda júrip ańsary atameken bolǵan qandastardyń sha­ńyra­ǵynda ul týǵanda Qazaq­standy kóp jyl basqarǵan, qazaqtyń birtýar uly Din­muhamed Qonaev atasynyń esimin berip, azan shaqyrǵan ǵoı. Dinmuhamed atasy sekildi bul ul da Dımash atandy. Ol 9-synypqa kóshkende ata-anasy Rýdnyı qalasyna kóship keldi. О́zbekstannyń Naýaı oblysynan kelgen aǵaıyndar shetinen kenshi. Dımash Dáý­letov te mektepti bitire sa­la kenshiler qalasyndaǵy Qurylys jáne kólik-tehnı­kalyq kolledjine tústi, ekskavatordy shyr kóbelek aınaldyratyn, búge-shigesine deıin jóndeıtin maman bolyp shyqty. Sokolov-Sarybaı ken óndirý bir­les­­tiginiń Avtokólik bas­qarmasynyń tehnıka jóndeý sehynda slesar bolyp eki jyl istedi. Uldyń qoly jumysta bolǵanmen, kókiregin án kerneıtin. О́zbekstannan atajurtqa qonys aýdarǵan aǵaıynnyń jastarynda úlkenniń aldynan ótpeıtin, úlken turyp, kishi sóılemeıtin ıbalyq, qazaq, orys, ózbek tilderinde saırap tursa da, «men» dep kókiregin urmaıtyn uıańdyq kózge uryp turady. Sol minez, sol dil Dáý­letovtiń ósken otbasyna da tán edi. – Ándi úıde aıtyp júremin, biraq ony kóp­shilik bile bermeıtin. Kol­ledj­ge túserde ustazdar «qan­daı óneriń bar?» dep surady. Men oqýǵa túsýge kómek bola bersin dep, oılanyp otyrdym da «án aıtamyn» dedim. Sodan oqyp júrgende ustazym Aıgúl Amanjolqyzy meni bolmaı sahnaǵa shyǵardy. Barlyǵy sodan bastaldy, – deıdi D.Dáý­letov. Kenshilik jumysty ol unatpaı qalǵan joq, tabysy da jaman emes edi. Alaıda, án men ken bir Dımashqa aýyr soǵatynyn sezdi. Sonan soń Astanaǵa baryp, mýzykalyq bilim alǵysy keldi. Qazir bas qaladaǵy Qazaq ulttyq óner ýnıversıtetiniń estradalyq vokal fakýltetiniń daıyn­dyq kýrsyna tústi. «Golos Kazahstana» telejobasynda qazylar alqasy Dáý­letovtiń daýy­syna erekshe baǵa berdi. Er adamdarda sırek kezde­setin daýys dep tanydy. – Meniń daýysymdy Robertıno Lorettıdiń daýy­syna uqsatady. Meniń ar­manym – Robertınoǵa uq­saý emes, mýzykalyq bilim alyp, óz daýysymdy tabý, – deıdi Dımash Dáýletov. Ol óner jolynyń qıyndyǵy da kenishtiń beınetinen kem emes ekenin biledi. Biraq óner ony tańdaǵandaı. Názıra JÁRIMBETOVA, «Egemen Qazaqstan» QOSTANAI