Bıýdjet shyǵystarynyń tıimdiligin túbegeıli arttyrý qajet - Elbasy

Salyq-bıýdjet saıasatyn jańa ekonomıkalyq jaǵdaıǵa beıimdep, bıýdjet shyǵystarynyń tıimdiligin túbegeıli arttyrý qajet. Bul týraly QR Prezıdenti halyqqa Joldaýynda málimdedi. "Biz 2017 jyly memlekettik damý baǵdarlamalaryn qajetti resýrstarmen tolyqtaı qamtamasyz ettik. Mınıstrlikter men vedomstvolardyń qarajatty ıgerýiniń tıimdiligin tekserý qajet. Respýblıkalyq bıýdjettiń 40 paıyzdan astamyn quraıtyn Densaýlyq saqtaý,  Eńbek jáne halyqty áleýmettik qorǵaý, Bilim jáne ǵylym mınıstrlikterinen bastaý kerek. Onyń qorytyndysy boıynsha maǵan baıandalsyn. Tıimsiz baǵdarlamalardyń qarajatyn Úshinshi jańǵyrtý mindetterin iske asyrýdy qamtamasyz etetin baǵdarlamalarǵa qaıta bólý qajet. Sondaı-aq, qarajatty naqty ekonomıkaǵa neǵurlym tezirek ári tıimdirek jetkizý úshin bıýdjettik rásimderdi jeńildetken jón", - deıdi Elbasy. "Biz fıskaldyq ortalyqsyzdandyrý saıasatyn jalǵastyrýymyz kerek. О́tken jyldarda ortalyqtan jergilikti jerlerge kóptegen fýnksııalar men ókilettikter berildi. Endi olardyń jetkilikti qarjylyq derbestigin bekemdeı túsý qajet. Sonymen birge, qarjy shyǵysy jónindegi ókilettikterdiń oblystyq deńgeıde shoǵyrlanýyna jol bermeý mańyzdy. Olardy ári qaraı aýdandyq jáne aýyldyq jerlerge berý kerek. Ákimder óńirlik jáne jergilikti mańyzy bar máselerdi sheshýge tıis, al Úkimet jalpymemlekettik máselelerge den qoıýy qajet", - dedi Elbasy.