Onyń aıtýynsha, jańa Konstıtýsııa jobasy jarııalanǵan sátten bastap ártúrli arnalar arqyly 4 myńnan astam usynys kelip túsken. Baqyt Nurmuhanov atap ótkendeı, Konstıtýsııalyq komıssııa barlyq usynystar, pikirler men eskertýlerdi muqııat zerdelep jatyr.
«Taldaý kórsetkendeı, olardyń birqatary nazar aýdarýǵa turarlyq jáne baptardyń mazmunyn tolyqtyrady, kepildikterdi kúsheıtedi, quqyqtyq normalardyń tujyrymdamasyn jaqsartady, sondaı-aq aıqyndyq pen quqyqtyq naqtylyqty arttyrady», dedi Baqyt Nurmuhanov Konstıtýsııalyq komıssııanyń kezekti otyrysynda.
Dálirek aıtqanda, teńgeni ulttyq valıýta retinde konstıtýsııalyq turǵyda bekitý usynysyn júzege asyrý úshin 2-bap jańa tarmaqpen tolyqtyryldy. Qazaqstan Respýblıkasynyń ulttyq valıýtasy (aqsha birligi) – teńge.
Teńgeni emıssııalaýdyń aıryqsha quqyǵy Qazaqstan Respýblıkasyna tıesili. Spıkerdiń aıtýynsha, azamattardyń ótinishterinde de osyndaı usynystar bolǵan.
Bul baptyń 6-tarmaǵy 7-tarmaq bolyp ózgertilip, joba redaksııasynda mynadaı mazmunda saqtalady: «Qazaqstan Respýblıkasynyń Egemendigi, Táýelsizdigi, ýnıtarlyǵy, aýmaqtyq tutastyǵy men basqarý úlgisi ózgermeıdi».
«6-bapta memlekettik organda saıası partııa uıymyn qurýǵa jol berilmeıtini týraly normany 1-tarmaqtan 2-tarmaqqa ózgerissiz aýystyrý usynylyp otyr. Bul norma atalǵan baptyń 2-tarmaǵynyń erejelerin logıkalyq turǵydan tolyqtyrady, onda memlekettiń qoǵamdyq birlestik isine, al qoǵamdyq birlestiktiń memleket isine zańsyz aralasýyna jáne qoǵamdyq birlestikke memlekettik organ fýnksııalaryn júkteýge jol berilmeıtini jazylǵan», dep habarlady Baqyt Nurmuhanov.
Konstıtýsııa jobasynyń azamattyq máselelerine arnalǵan 12-baby da naqtylaýdy qajet etedi degen usynystar aıtyldy. Atap aıtqanda, 3-tarmaqqa Qazaqstan Respýblıkasynyń azamaty qos azamattyqqa nemese kóp azamattyqqa ıe bola almaıtyny, al ózge azamattyqtyń bolýy zańda kórsetilgen tártip pen sharttarǵa sáıkes, Qazaqstan Respýblıkasynyń azamattyǵyn toqtatýǵa negiz bolatyny týraly norma engiziledi.
Engizilgen usynystar ishinde Konstıtýsııada árbir adamnyń memlekettik bılik organdary men olardyń qyzmetshileriniń zańsyz áreketteri saldarynan kelgen zalaldyń ótemin alýǵa quqyǵyn bekitý de erekshe qyzyǵýshylyq týdyrǵan.
«Qylmystyq-prosestik kodekste qylmystyq prosesti júrgizetin organnyń zańsyz áreketterinen keltirilgen zalaldy óteý tártibin retteıtin 4-taraý qarastyrylǵan. Ondaǵy erejelerge sáıkes, zańsyz ustaý, qamaýda ustaý, úıqamaqqa alý, qyzmetinen ýaqytsha shettetý, arnaýly medısınalyq uıymǵa ornalastyrý, sottaý, medısınalyq sıpattaǵy májbúrleý sharalaryn qoldaný saldarynan keltirilgen zalal qylmystyq prosesti júrgizetin organnyń kinásine qaramastan tolyq kólemde bıýdjet qarajaty esebinen óteledi», dep atap ótti spıker.
Jańa Konstıtýsııada teńgeni ulttyq valıýta retinde bekitý usynyldy
Sonymen birge ol Konstıtýsııa jobasynyń 18-baby naqtylanǵanyn aıtty. Jańa redaksııaǵa sáıkes, sot sheshiminsiz adamdy zańda kózdelgen merzimderden artyq ustaýǵa bolmaıdy. Sóz sońynda Baqyt Nurmuhanov jańa Konstıtýsııa jobasyn jetildirý jumystary jalǵasyp jatqanyn jetkizdi.
Aıta keteıik, búgin Konstıtýsııalyq komıssııanyń kezekti toǵyzynshy otyrysy ótip jatyr.
