Spektaklge qatysqan óner sheberlerine kórsetilgen erekshe qurmet te keshtiń mańyzyn arttyra tústi. Memleket basshysy Qasym-Jomart Toqaevtyń atynan yqylas gúlderiniń usynylýy ártisterdiń eńbegine kórsetilgen qurmettiń, rýhanı qundylyqtarǵa berilgen joǵary baǵasynyń kórinisindeı áser qaldyrdy.
Aıtýly keshtiń basty kórkemdik júgin álemdik hám otandyq opera sahnasynyń tanymal juldyzdary arqalady. Parıj, Mılan, London sahnalaryn baǵyndyrǵan otandyq soprano Marııa Mýdrıak Vıoletta Valerı partııasyn oryndap, keıipkerdiń ishki dramasyn tereń sezimmen jetkizdi. Bul ról ánshi úshin aıryqsha mánge ıe. Dál osy obrazben ol osydan on jyl buryn elorda sahnasynda debıýt jasaǵan edi. Ýaqyt óte kele onyń Vıolettasy kemeldenip, názik psıhologııalyq ıirimdermen tolyǵyp, kórermenge jańa qyrynan usynyldy. Marııanyń oryndaýyndaǵy Vıoletta – náziktik pen tragedııanyń, úmit pen sharasyzdyqtyń toǵysqan beınesi. Ásirese keıipkerdiń ishki kúızelisi men mahabbat jolyndaǵy qurbandyǵy ánshiniń vokaldyq múmkindigimen qatar, akterlik sheberligi arqyly shynaıy jetkizildi.
Al Alfred Jermon beınesin somdaǵan ıspandyq tenor Joel Prıeto kórermenniń erekshe yqylasyna bólendi. Onyń daýysy men sahnalyq harızmasy keıipkerdiń jastyq jalynǵa toly tabıǵatyn ashyp, mahabbat pen qyzǵanysh, úmit pen ókinish sezimderin nanymdy jetkizdi. Álemdik deńgeıdegi sahnalarda – Kovent-Garden, La Skala, Parıj ulttyq operasy men Zalsbýrg festıvalinde óner kórsetip júrgen ánshiniń elimizdegi alǵashqy óner kórsetýi mádenı baılanystyń keńeıýiniń jarqyn mysaly boldy.
Jorj Jermon partııasynda Talǵat Musabaev sahnaǵa shyǵyp, qoıylymnyń dramalyq ózegin aıqyndady. Onyń oryndaýyndaǵy áke beınesi qataldyq pen janashyrlyqtyń, salqyn esep pen ishki tolǵanystyń úılesimi retinde kórinis tapty. Bul keıipker arqyly operadaǵy negizgi moraldyq qaqtyǵys aıqyndalyp, oqıǵa tereńdeı tústi.
Mýzykalyq jetekshilikti qolǵa alǵan ıtalııalyq dırıjer Djýzeppe Akýavıva spektakldiń tutastyǵyn joǵary deńgeıde qamtamasyz etti. Onyń basqarýyndaǵy sımfonııalyq orkestr Verdı mýzykasynyń názik lırızmin de, dramalyq qýatyn da dál jetkizip, sahnadaǵy árbir emosııany kúsheıtip otyrdy. Orkestr men solısterdiń úılesimi, hor partııalarynyń naqtylyǵy qoıylymnyń kásibı deńgeıin aıqyndady.
Jalpy alǵanda, «Travıata» operasynyń bul qoıylymy mýzykalyq spektakl ǵana emes, úlken mádenı dıalog alańyna aınaldy. Álemdik deńgeıdegi ártister men otandyq óner sheberleriniń bir sahnada toǵysýy ulttyq teatr óneriniń halyqaralyq bedelin nyǵaıta tústi.
