OQO-ǵa saıahattaýshylar sany 30 paıyzǵa artqan

OQO-ǵa saıahattaýshylar sany 30 paıyzǵa artqan. Bul týraly OQO Kásipkerlik, ındýstrıaldy-ınnovasııalyq damý jáne týrızm basqarmasy basshysynyń orynbasary Almat Súıýbaev aıtty, dep habarlaıdy oblystyq ákimdiktiń baspasóz qyzmeti. Basshy orynbasarynyń málimetinshe, ótken 2016 jyly aımaqtaǵy ornalastyrý oryndary - qonaq úıler men lagerlerde, demalys oryndarynda aıaldaǵan týrısterdiń sany 142 myń adamǵa jýyqtap, 2015 jylmen salystyrǵanda 33 myń adamǵa (30,4 paıyzǵa kóbeıgen) ósti. Sáıkesinshe, saıahatshylardyń turaqtaý oryndary da kóbeıgen. Máselen, byltyr Ońtústiktegi ornalastyrý oryndarynyń sany 167-i bolyp, 2015 jylmen salystyrǵanda 27,4 paıyzǵa artyp otyr. Sondaı-aq, byltyr atalǵan qyzmet kórsetý oryndarymen kórsetilgen qyzmet kóleminiń qarjysy 2 mlrd teńgege (1 991 303,6 myń teńge) jýyqtap, 2015 jylmen salystyrǵanda (1 408 972,4 myń teńge) 41,3 paıyzǵa kóbeıgen. «2016 jyly óńirdiń týrıstik tanymaldyǵyn arttyrý maqsatynda «The Heart of the Silk Way» («Jibek jolynyń júregi») týrıstik brendi ázirlendi. Sonymen qatar, «Ontustik Tourism Center» Týrıstik aqparattyq ortalyǵy» memlekettik kommýnaldyq mekemesiniń  saltanatty ashylý rásimi ótkizildi. Onda «Bir tereze» qaǵıdasy boıynsha jergilikti turǵyndarǵa jáne shet eldik týrısterge qyzmet kórsetilýde. Mysaly, 2016 jyly Ortalyq týrıstik bıznes ókilderine jáne gıdterge arnalǵan aǵylshyn tilin bilý deńgeıin joǵarylatý, týrızm boıynsha menedjment standarttary, meıramhana bıznesi jáne marketıng, qonaq úı bıznesi jáne basqarý, gıd-ekskýrsovodtardyń qyzmeti syndy  taqyryptarda semınar-trenıngter ótkizdi», – dedi A.Súıýbaev. Osy syndy salada atqarylǵan jumystarǵa esep bergen Almat Saǵyntaıuly bıylǵy týrızmdi damytý aıasynda atqarylatyn sharýalardyń retin atady. 2017 jylǵa arnalǵan josparǵa sáıkes, salany damytý 4 baǵytta júrgiziledi. Atap aıtqanda, olar - óńirdiń týrıstik ımıdjin marketıngtik ilgeriletý, týrızm salasynda qyzmet kórsetý sapasyn arttyrý, týrızmdi damytýdyń júıeli máseleleri jáne týrızm ınfraqurylymyn damytý. Mysaly, óńirdiń týrıstik ımıdjin marketıngtik ilgeriletý boıynsha josparlanǵan negizgi is-sharalar sheńberinde «Ontustiktravel.kz» saıtyn jáne «ON Guide» mobıldik qosymshasyn qosymsha qytaı, arab jáne túrik tilderindegi aqparattarmen tolyqtyrýdy qamtamasyz etý josparlanyp, oblys boıynsha oqıǵaly is-sharalar kúntizbesin ázirlep, «Ontustiktravel.kz» saıtyna ornalastyrý syndy sharalar kózdelgen. Munan bólek, 2017 jyly týrızmniń ınfraqurylymyn damytý josparlanýda. Onyń ishine birqatar zákirlik jobalardy júzege asyrý boıynsha sharalar engizilgen. Atap aıtqanda, «Saryaǵash», «Túrkistan», «Shardara», «Qasqasý» jáne týrıstik marshrýttardyń boıynda kishi ınfraqurylymdy damytý josparda bar. Sonymen qatar, tilshilermen bolǵan kezdesýde oblysymyzdyń EKSPO-2017 halyqaralyq kórmesine daıyndyǵy da aıtyldy. О́ńirimizge keletin qonaqtar úshin ázirlengen úsh jáne bes kúndik týrıstik baǵyttar ishinde Otyrar, Túrkistan, Qazyǵurt, Tólebı, Túlkibas jáne Saıram syndy aýdan, qalalar qamtylǵan.