Darıǵa Nazarbaeva azyq-túlik baǵasyn tómendetýdiń jańa tásilin usyndy

15 aqpanda Parlament Senatynda Darıǵa Nazarbaeva bastaǵan Halyqaralyq qatynastar, qorǵanys jáne qaýipsizdik komıteti azyq-túlik qaýipsizdigin qamtamasyz etý máseleleri boıynsha Aýyl sharýashylyǵy mınıstrliginiń basshylyǵymen kezdesti, dep jazady Qazaqparat. D.Nazarbaeva Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýyndaǵy basym baǵyttardyń biri agroónerkásip keshenin damytý ekenine kezdesýge qatysýshylardyń nazaryn aýdardy. Azyq-túlik qaýipsizdiginiń ındeksine sáıkes, (The Global Food Security Index) Qazaqstan 2016 jyldyń qorytyndysy boıynsha reıtıngke qatysqan 113 eldiń arasynda 68 oryndy (2015 jyly 109 eldiń ishinde 56 orynda boldy) alǵan bolatyn. Aýyl-sharýashylyǵy mınıstriniń birinshi orynbasary Q.Aıtýǵanov eldiń azyq-túlikke suranysyn otandyq óndiris esebinen qamtamasyz etý jáne agroónerkásip keshenin memlekettik qoldaý sharalary týraly senatorlardy habardar etti. Baıandamashy negizgi azyq-túlik taýarlarymen ishki naryqty qamtamasyz etý jaǵdaıy 80 paıyzdy quraıtynyn atap ótti. Bul rette kúrish, qoı eti, jumyrtqa, astyq, nan, arpamen 100 paıyz qamtamasyz etilýde. Ishki naryqtaǵy et te (qus etinen basqa) ımportqa táýeldi emes. Sonymen birge otandyq óndiristiń jekelegen ónimderi ishki tutyný barysynda áli de tómen deńgeıde qalyp otyr. Ol - qus eti (51,8 paıyz), sary maı (68,3 paıyz), irimshik pen súzbe (56,5 paıyz), kúnbaǵys maıy (72,9 paıyz), kolbasa ónimderi (58,7 paıyz), alma (58,0 paıyz), balyq (65,5 paıyz). Senatorlar S.Jaqsybekov, I.Adyrbekov, L.Kıınov, M.Altynbaev M.Kóbenov, G.Kım azyq-túlik qaýipsizdigin qamtamasyz etý jáne agroónerkásip kesheni jumysyn jetildirý jónindegi óz usynystaryn aıtty. Depýtattar aýyl sharýashylyǵy nesıelerin tıimdi paıdalaný, otandyq ónimderdi, ǵylymı-zertteý ınstıtýttarynyń jumysyn qoldaý, aýyl sharýashylyǵy salasyn zańnamalyq turǵyda qamtamasyz etý máselelerin kóterdi. Komıtet tóraǵasy D.Nazarbaeva azyq-túlik ónimderiniń qymbattaýyna alańdaýshylyq bildirdi jáne «azyq-túlik ónimderine saýda ústemesin zańdy túrde shekteý qajet» ekenin atap ótti.