QR Mádenıet jáne sport mınıstri Arystanbek Muhamedıuly Avstrııada ótip jatqan álem chempıonatynda qazaqstandyq bıatlonshylarǵa jasalǵan dopıng-synamalarynyń qorytyndysy jaıly Facebook jelisindegi paraqshasynda bólisti.
«... Dostar, qazir ǵana Búkilálemdik antıdopıng agenttigi (WADA) bizdiń bıatlonshylarymyzǵa jasalǵan dopıng-synamalarynyń qorytyndysy boıynsha sportshylarymyzdyń qanynan tyıym salynǵan zattar shyqpaǵany týraly resmı túrde qaǵaz aldyq! Buǵan deıin aıtqanymdaı, sportshylarymyz taza!
Men basynan komandamyzǵa senim arttym jáne senimdi aqtaǵanyna rıza bolyp otyrmyn. Bul bárimizge úlken sabaq boldy. Al mynaý WADA qujattary, nómirlerdiń astynda sportshylarymyzdyń esimderi jasyrylǵan», – dedi mınıstr.
Aıta keteıik, Avstrııada jergilikti janarmaı quıý beketteriniń birinde belgisiz sportshylar medısınalyq qaldyqtar salynǵan qoraptar men jarys qujattaryn tastap ketken. Dopıngke qarsy ulttyq ortalyqtyń júrgizgen saraptamasynyń nátıjesinde atalmysh qoraptar men qujattar Qazaqstan delegasııasyna tıesili ekendigi anyqtaldy.
