QR Premer-mınıstri «Kazakh Invest» dırektorlar keńesin basqarady

QR Úkimet basshysy Baqytjan Saǵyntaev ınvestısııalar jónindegi «Kazakh Invest» ulttyq kompanııasy dırektorlar keńesin basqarady. Bul týraly búgin Úkimette ótken baspasóz máslıhatynda QR IDM Investısııalar jónindegi komıtettiń tóraǵasy Saparbek Tuıaqbaev málim etti, dep habarlaıdy QazAqparat. «Bul ulttyq kompanııanyń deńgeıi joǵary bolady. Investorlar tikeleı mınıstrlerge jolyǵýǵa múmkindik alady, sonymen qatar kelisimderge qol qoıý baǵytynda Úkimet basshysyna da ózderiniń usynystaryn aıta alady. Osy ulttyq kompanııanyń dırektorlar keńesin Premer-Mınıstr basqarady degen sheshim qabyldandy»,-dedi komıtet basshysy. Onyń sózine qaraǵanda, «Kazakh Invest» kompanııasyn qurý rásimderi aqpannyń sońyna deıin aıaqtalady. Ulttyq kompanııa sheteldik ókildikter men fılıaldardyń aýqymdy jelisin qamtyp, Úkimet atynan iri ınvestorlarmen jáne maqsatty transulttyq korporasııalarmen «biregeı kelissóz júrgizýshi» retinde  is-qımyl jasaıtyn bolady. Kompanııa fýnksııalaryna ınvestısııalyq jobalardy ázirleýdi qamtamasyz etý, ınvestısııany qajet etetin jobalardyń tizimin ázirleý, maqsatty jáne daıyndyǵy bar ınvestorlardy tartý kiredi. «Bul kompanııanyń sheteldegi fılıaldary vızalyq qoldaý, kezdesýler men kelissózderdi uıymdastyrý, ruqsatnamalardy alý sekildi qoldaý sharalaryn qamtıdy»,-dedi Tuıaqbaev.