Foto: istockphoto.com
Bank málimetinshe, alaıaqtardyń áreketi fıshıngtik saıttar men áleýmettik jelilerden jınalǵan derekterden bastalady. Olar klıenttiń atynan bankke habarlasyp, «kartamdy joǵalttym» degen jeleýmen ony buǵattaýǵa qol jetkizedi. Osydan keıin alaıaqtar zardap shegýshige qońyraý shalyp, ózderin «qaýipsizdik qyzmeti» retinde tanystyrady. «Shotty buǵattan shyǵaramyz» nemese «qarajatty qaýipsiz jerge aýdaramyz» degen aldaýmen SMS-kod pen qupııa parolderdi ıemdenip alady.
«Tólem kartasy buǵattalǵan jaǵdaıda kartanyń ekinshi betinde nemese mobıldi qosymshada kórsetilgen nómir arqyly banktiń resmı koll-ortalyǵyna habarlasqan durys. Esińizde bolsyn, qarjy uıymdarynyń qyzmetkerleri SMS-habarlamada kórsetilgen parol men kodty eshqashan suramaıdy jáne mobıldi qurylǵyny qashyqtan basqaratyn qosymshalardy ornatýdy talap etpeıdi», delingen habarlamada.
Budan bólek, bankomat mańynda «kartam zaqymdaldy» dep basqanyń shotyna aqsha aýdartýǵa kómek suraıtyn «kezdeısoq jolaýshylardan» da saq bolǵan jón. Mundaı «kómek» sizdi baıqaýsyzda dropperlik (qylmystyq aqshany jylystatý) áreketke ıtermelep, zań aldynda jaýapqa tartýy múmkin.
«Bank kartasy men onyń derekterin eshkimge bermeýge, beıtanys adamǵa aqsha aýdarmaýǵa, árkez qyraǵy júrýge jáne kez kelgen aqparatty ekinshi deńgeıli bankterdiń resmı nómirleri arqyly koll-ortalyǵyna qońyraý shalyp, tekserip alýǵa keńes beredi.
Ulttyq bank qyzmetkerleri jeke tulǵalardyń shotyna qyzmet kórsetpeıtinin, aýdıo jáne vıdeoqońyraý shalmaıtynyn, túrli ınvestısııalyq paı qorlary men qarjy ónimderine aqshalaı salym salýdy usynbaıtynyn, qarajatty saqtandyrýmen aınalyspaıtynyn jáne halyqpen aqshalaı esep aıyrysý operasııalaryn júrgizbeıtinin eske salamyz», delingen habarlamada.
