Janat Jaqııanov: «Qarsylasym osal bolǵan joq»

Ortalyq kommýnıka­sııalar qyzmetinde kásip­qoı boksshy Janat Jaqııanovpen brıfıng ótti. Bylǵary qolǵap sheberi 10 aqpanda AQSh-tyń Toledo qala­synda amerıkalyq Roshı Ýorrenmen ju­dyryq túıistirip, asa jeńil salmaqta WBA (Super) jáne IBO tu­jyrymy boıynsha chempıon ataǵyn jeńip alǵan edi. Kezdesý barysynda boksshy baspasóz máslıhatyn ótkizip, Qu­­rama Shtattarda ót­ken jekpe-jek týraly áńgi­melep berdi. Kezdesýde Jaqııanov Roshı Ýorrenmen aıqastyń ońaı bolmaǵanyn, jekpe-jektiń barlyq raýndtarynda jattyqtyrýshysy Rıkkı Hattonnyń aqyl-keńesterin tyńdap, qarsylasyna eshqan­daı múmkindikti bermeýge tyrysqanyn aıtty. – Meniń qarsylasym osal bolǵan joq. Ol ke­zinde WBA (Super) jáne IBO tujyrymy boıynsha álem chempıony ataǵyn ıelengen. Osy jekpe-jekte Ýorrenniń ataǵyn jeńip aldym. Birinshi raýndta Ýorrenniń soqqylarynyń joı­qyn bolatynyn bilgen­min. Rıngke soǵan daıyndalyp shyqtym. Jekpe-jektiń basynda eki ret nokdaýn alyp qaldym. Biraq, kezdesý tizginin ózimniń qoly­ma alyp, jekpe-jekti je­ńispen aıaqtadym. El namysy synǵa túsip jatqanda jeńilý degendi bilmeımin, bilgim de kelmeıdi. Sodan bolar, jekpe-jekte arqam qyzyp, Ýorrendi qýalap júrip soqqylaǵym keldi. Ol «besinshi buryshty» izdep ketkende bosańsymaı, ishimnen sharýany sol jerde tyndyrý kerek dep sheshtim. Sharshy alańda aıqyn ba­sym­dyqpen jeńgenimdi sezdim. Qa­zylar alqasy da maǵan basym daýyspen baǵa berdi, – dedi ol. Brıfıngte Jaqııanov osy aıqasqa WBA jáne IBO tujyrymy boıynsha birinshi orta salmaqtaǵy álem chempıony Rıkkı Hattonnyń jetekshiligimen daı­yn­dal­ǵanyn, jattyǵý­lar­dyń bári Uly­brı­tanııada ót­kenin aıtty. – Rıkkı Hatton tamasha jattyqtyrýshy. Men onyń komandasymen birneshe jyldan beri jumys istep kelemin. Ol 2007 jyly kásipqoı boksqa kelgenimde meni baıqap, ózine shaqyrdy. Sodan beri búginge deıin 28 jekpe-jek ótkizip, 27 ret jeńiske jettim. Bizdiń jattyǵýlar Ulybrıtanııada ótedi. Ol jaqta bári jaqsy uıymdastyrylǵan. Mysaly, sońǵy jekpe-jekke 10 apta daıyndaldym, – dedi Janat Jaqııanov. Sonymen birge, ol shet elden shaqyrtýlar kelip jatsa eshqaıda ketpeıtinin málimdedi. О́zine qoldaý kórsetip, demeýshilik jasap jatqan Soltústik Qazaq­stan oblysynyń ákimdigi men jer­gilikti sport basqarmasyna alǵysyn bildiretinin aıtty. – Men eshqaıda ketpeımin. Ketkim de kelmeıdi. Meniń Otanym – Qazaqstan. Qazaq eliniń namysyn qaı jerde bolsa da qorǵap, aspan tústi týymyzdy bıikte jelbiretip júremin. Qazir Petropavl qalasynda oblystyq balalar jáne jasóspirimderge arnalǵan mektep-ınternatta jattyqtyrýshy bolyp qyzmet etemin. Bıyl bizdiń mekteptiń úsh tárbıelenýshisi «Sport sheberi» atandy. Aldaǵy kezde de sport ordasynan talaı jas talantty boksshylardyń túlep shyǵatynyna senimdimin. Qazir oblysta boksqa qyzy­ǵatyn balalar kóp. Mu­nyń bári oblys ákimi men sport basqarmasynyń sport mek­tepterine kórsetip jatqan qoldaýynyń arqasy, – deıdi boksshy. Kezdesý sońynda Jaqııa­nov kelesi qarsylasy Djeıms Mak­donaldstiń bolýy múm­kin ekenin aıtty. Dastan KENJALIN, «Egemen Qazaqstan» ASTANA