Foto: Ashyq derekkóz
Úkimet otyrysynda О́nerkásip jáne qurylys mınıstri Ersaıyn Naǵaspaev avtomobıl jasaý salasy ótken jyly rekordtyq ósim kórsetkenin atap ótti. Onyń aıtýynsha, avtokólik óndirisi mashına jasaý sektorynyń 41,7 %-yn qurap, 171 myńnan astam tehnıka shyǵarylǵan. Sonyń 159 myńy – jeńil avtomobıl.
Saladaǵy serpindi damý jańa óndiris oryndarynyń ashylýymen jalǵasyp jatyr. Almatyda Chery, Haval, Changan brendterin qurastyratyn mýltıbrendti zaýyt iske qosylsa, Qostanaıda Kia Qazaqstan kásiporny jumysyn bastady. Joǵary tehnologııaly bul óndirister avtokomponentterdi el ishinde shyǵarýǵa jol ashyp otyr.
О́tken jyly Almaty ındýstrııalyq aımaǵynda avtokomponentter tehnoparki paıdalanýǵa berildi. Munda avtokólikterge arnalǵan mýltımedıa júıeleri men oryndyqtar shyǵarylady. Saran qalasynda Tengri Tyres zaýyty avtomobıl shınalaryn óndirip jatyr. Al Qostanaıdaǵy KamLitKZ kásipornynda zamanaýı avtomattandyrylǵan júıelerge negizdelgen shoıyn quıý óndirisi iske qosylǵan.
Buǵan qosa Allur kompanııasy avtokomponentter óndirisin lokalızasııalaý ortalyǵynyń qurylysyn bastap ketti. Bul joba otandyq óndirýshilerdiń tehnologııalyq áleýetin kúsheıtip, qosalqy bólshekter ımportyn azaıtýǵa múmkindik beredi.
Aldaǵy 3 jylda jylytý jáne kondısıonerleý júıeleri, tejegish tetikteri, salon men edenge arnalǵan plastıkalyq bólshekterdi el ishinde shyǵarý josparlanyp otyr. Osylaısha, avtomobıl ónerkásibinde qosylǵan qun tizbegi keńeıip, otandyq óndiristiń básekege qabileti arta túspek.
