Dúnıejúzilik boks serııasy: Oljas Sáttibaev jeńispen bastady

Taldyqorǵan qalasynda ótip jatqan Dúnıejúzilik boks serııasynda (WSB) qazaqstandyq «Astana Arlans» pen ózbekstandyq «Ozbek tigers» komandalary qolǵap túıistirdi. Alǵash bolyp sharshy alańǵa 52 kılo salmaqta otandasymyz Oljas Sáttibaev pen Abrorjan Kodırov shyqty. Osy maýsymda komandanyń jańa kapıtany bolyp taǵaıyndalǵan jerlesimiz alǵashqy raýndta barynsha shabýylǵa kóńil bólip, ózbekstandyq qarsylasyn soqqylarynyń astyna aldy. Alaıda, ekinshi raýndta Kodırov belsendirek qımyldap, Sáttibaevtyń tegeýrinin toqtatýǵa tyrysty. Kelesi úsh mınýtta jerlesimiz aıqyn basymdyqqa ıe boldy. Birneshe ret buryshqa taqap alyp dál soqqylaryn ótkize bildi. Úsh raýndtyń qorytyndysy boıynsha Sáttibaev alda boldy. Jekpe-jektiń tórtinshi raýndynda Abrorjan las oıynymen kózge túsip jatty. Sáti kelse aıaǵymen basyp qalyp, shyntaǵymen bildirmegen bolyp uryp jatty. Sońǵy besinshi raýndta Oljas saq qımyldap, qarsylasynyń shabýylynan der kezinde sytylyp júrdi. Qorytyndysynda otandasymyz jeńiske jetti.