BAQ league: «Egemen Qazaqstan» qatarynan tórtinshi jeńisine qol jetkizdi

Búgin elordada qalalyq fýtbol federasııasynyń qoldaýymen ótip jatqan jýrnalıster arasyndaǵy BAQ league-diń kezekti oıyndary oınaldy. Alǵash bolyp alańǵa «Egemen Qazaqstan» men «Dixinews.kz» komandalary shyqty. Tartysty ótken oıynda bas basylymnyń jigitteri 10:5 esebimen jeńiske jetti. Birinshi taımda 3:3 esebi tirkelgenmen, kelesi 20 mınýtta «Dixinews.kz» ujymy sanaýly mınýttardyń ishinde-aq eki dop aıyrmashylyǵymen alǵa shyqty. Alaıda, namysqa basqan «egemendikter» kóp uzamaı, jeti goldy birinen soń birin jaýdyrdy. Bul matchta komandanyń shabýyl shebinde óner kórsetetin Berik Ýálı penta-trık jasasa, qorǵaýshy Erkebulan Aldabergenov úsh doptyń avtory atandy. Sondaı-aq, «Egemen Qazaqstan» basylymynyń basqarma tóraǵasy Darhan Qydyráli men komanda forvardy Azamat Jandarbekov bir-bir márte mergendigimen tanyldy. Bul kúni sondaı-aq taǵy da tórt match ótti: «Sportsffa.kz» 4:2 «Qazaq radıosy» «24.kz» «Kazakh TV» «Sports 59» 7:3 «Jeńis» «Habar» 6:3 «Qazaqstan» Aıta keteıik, BAQ ókilderi arasyndaǵy birinshilik 11 jeltoqsan kúni «Astana» sport kesheninde bastalǵan. 11 ujymnyń arasyndaǵy chempıonattyń búginge deıin 10 týry ótti. Nátıjesinde, týrnırlik kestede 23 upaımen «Qazaq radıosy» kósh bastap kele jatsa, dál osyndaı upaımen «Habar» agenttiginiń jigitteri izin qýyp keledi. Degenmen, qosymsha bir oıyny bar ekenin aıta ketken jón. Al úzdik úshtikti 16 upaımen «Sportsffa.kz» túıindep tur. Al surmergender tiziminde «Sports 59» shabýylshysy Saparǵalı Qanat 20 golymen birinshi bolyp tursa, ekinshi orynǵa 16 dop soqqan «Qazaq radıosynyń» oıynshysy Nursultan Qabylbekov jaıǵasty. Al qarsylasyn 10 márte qapy qaldyrǵan «Qazmedıa» forvardy Qanat Takırov úshtikke endi.