Kóksaıdaǵy qar kóshkini apat aıtyp kelmeıtinin kórsetti

Qańtar aıynda qar kórmegen Jambyl oblysy aqpan aıynda qalyń qardyń astynda qal­dy. Aqpan aıynyń alǵash­qy kúnderinen-aq qys qaha­ryn tanytyp, mezgil mine­zin kórsetip tur. Qardyń qa­lyń jaýǵany sonshalyq, eldime­ken­der arasynda kólik qozǵalysy qıyndady. Tipti, keıbir azamattar mun­daı qystyń sońǵy on jyldyń kóleminde bolmaǵanyn aıtady. Al uıaly telefonǵa sońǵy kezderi «Almaty – Tash­kent» tasjolynyń jabylǵan­dyǵy týraly habarlamalar da jıi túsip jatty. Alaıda, tabı­ǵattyń tosyn minezine qar­sy turatyn qaýqar joq. Kúre jol­dardy qansha kúregenmen, kún saıyn jaýǵan qardyń turǵyndardy ábigerge salǵany anyq. Apat aıtyp kelmeıdi. 17 aq­pan kúni Jambyl obly­syn­da tótenshe jaǵdaı oryn alyp, qalyń eldi dúr sil­kin­dirdi. Jýaly aýdany, Kók­saı shatqalynda áskerı jat­tyǵý kezinde qar kóshkini jú­rip, 7 ás­kerı qaza tapty. Tosyn­nan kelgen apat saldary­nan áskerıler qalyń qardyń astynda qalyp qoıǵan. Kóksaı shatqalynda 91678 áskerı bólimshesin jos­parly jaýyngerlik daıyn­dyqtan ótkizý barysynda kenetten qar kóship, qaıǵyly oqıǵanyń oryn alǵanyn sol kúni resmı túrde Qazaqstan Res­pýb­lıkasy Qorǵanys mınıstr­liginiń baspasóz qyzmeti málim­de­di. Al elimizdiń Ishki ister mınıstr­ligi Tótenshe jaǵdaılar komıtetiniń resmı ókili Rýslan Imanqulovtyń aıtýynsha, jalpy, jıyrmadan astam arnaıy jasaq sarbazy qarǵa kómilip qalǵan. Oblystyq Tótenshe jaǵdaı­lar departamenti baspasóz qyzmetiniń basshysy Sáýle Munataeva oryn alǵan tótenshe jaǵdaıǵa baılanysty departament tarapynan 75 adam men 7 tehnıkanyń oqıǵa ornyna shuǵyl jiberilgenin aıtady. Sondaı-aq, apatqa baılanysty oblystyq departament «shuǵyl jelini» iske qosty. Jáne oqıǵa ornyna qutqarý bólimshesiniń 185 qyzmetkeri men 24 tehnıka jumyldyrylǵan. Qutqarý jumystary sol kúni túngi saǵat on birge deıin júrgizilgen. Qaıǵyly oqıǵa 17 aqpan kúni tús mezgilinde bolǵan. Tótenshe jaǵdaılar departamentiniń kezekshi bólimine qoryqshy Álimbekovten Jýaly aýdany, Alataý aýylynan 35-40 shaqyrym jerde ornalasqan Kóksaı shatqalynda qar kóshkini júrip, 23 áskerıdiń qar astynda qalǵany týraly habar kelip túsedi. Arada bir saǵatqa jýyq ýaqyt ótkende qoryqshy departamenttiń kezekshi bólimine taǵy da habarlasyp, qar astynan 4 áskerıdi alyp shyqqanyn aıtady. Nátıjesinde, qutqarýshylardyń eńbegimen qardan zardap shekken 16 azamat qutqarylyp, olarǵa tıisti medısınalyq kómekter kórsetildi. Kóksaıdaǵy kóshkinge oraı, Qazaqstan Respýblıkasynyń Premer-Mınıstri Baqytjan Saǵyntaevtyń Jambyl oblysyndaǵy qaıǵyly oqıǵany tergeý barysyn óz baqylaýyna alatyny habarlanǵan bolatyn. Al 18 aqpan kúni elimizdiń Qorǵanys mınıstri Sáken Jasuzaqov oblysqa arnaıy keldi. Qorǵanys mınıstri qar kóshkininen zardap shekken áskerı qyzmetshilerdiń hal-jaǵdaıyn Tarazdaǵy áskerı gospıtalǵa ózi baryp bildi. Sondaı-aq, mınıstr Sáken Jasuzaqov pen oblys ákimi Kárim Kókirekbaev Jýaly aýdanynyń ortalyǵy Baýyrjan Momyshuly jáne Kúrkireýsý aýyldaryna baryp, qaıtys bolǵan Tileýjan Keńesov pen Muhıt Turysmaǵambetovtiń jáne Maqsat Shákenniń otbasyna kóńil aıtty. Qatardaǵy jaýynger Tileýjan Qýatjanuly 1993 jyly, efreıtor Muhıt Balmaǵanbetuly 1991 jyly B.Momyshuly aýylynda dúnıege kelgen. Qatardaǵy jaýynger Maqsat Qurmanǵazyuly 1995 jyly Kúrkireýsý aýylynda týǵan. Sondaı-aq, Qorǵanys mınıstri men oblys ákimi Taraz qalasyna da kelip, qaza tapqan Áýesbaı Erisbaevtyń otbasynda boldy. Kishi serjant Áýesbaı Kómekbaıuly 1992 jyly Taraz qalasynda dúnıege kelgen. Qaza bolǵan qalǵan úsh azamattyń da aty-jóni belgili boldy. 1988 jyly týǵan kishi serjant Ámir Aralbaev Ońtústik Qazaqstan oblysynyń Túlkibas aýdanynan, 1991 jyly týǵan aǵa leıtenant Álisher Moshabaev Almaty oblysynyń Úshtóbe qalasynan jáne 1991 jyly týǵan kishi serjant Maqsat Qydyrbaev Qyzylorda oblysynyń Shıeli aýdanynan. Keshe Qorǵanys mınıstrligi 91678 áskerı bóliminiń (óńirlik qolbasshylyǵy) aýmaǵynda Jýaly aýdanyndaǵy qar kósh­kininen qaza tapqan áskerı qyzmetshilermen qoshtasty. Jambyl oblysy ákimdiginiń baspa­sóz qyzmeti habarlaǵanyndaı, qaza tapqan áskerılerdiń máıiti týystaryna jetkiziledi. Oqıǵa oryn alǵan kúni-aq oblys ákimi Kárim Kókirekbaevtyń tapsyrmasymen qutqarýshylar jasaǵy men tehnıkalar jumyldyrylǵan bolatyn. Degenmen, qalyń eldi qamyqtyrǵan qaıǵyly oqıǵa oryn aldy. Tosynnan kelgen taǵdyrdyń jazýyna eshqandaı amal-aıla joq. Beımezgil sátte baqıǵa attanyp kete barǵan azamattardyń orny oısyrap qaldy. Qansha jerden taǵdyrdyń tosyn synaǵy, jazmyshtyń jazýy desek te, qaıǵynyń qalyń bulty kóptiń kókeıinen kópke deıin kóshpesi anyq. Jýaly aýdanynyń ákimi Baqtııar Kóp­bosynov qaıtys bolǵan ár azamattyń otbasyna ázirge 200 myń teńgeden qoldaý kórsetiletinin aıtty. Sondaı-aq, oblystaǵy áskerı qyzmetshiler de qoldaý kórsetýge daıyn. Biraq kóptiń kóńilinde kúreń muń qaldyrǵan Kóksaıdyń kóz jasy armanda ketken azamattardyń aqyrǵy demin uzaq ýaqyt umyta almaıdy... Hamıt ESAMAN, «Egemen Qazaqstan» Jambyl oblysy