Qanat Robsondy nokaýtqa túsirdi

Senbi kúni AQSh-tyń Ýılmıngton qalasynda kásipqoı bokstan birinshi orta salmaqta óner kórsetetin jerlesimiz Qanat Islam brazılııalyq Robson Asısti birinshi raýndta nokaýtqa túsirdi. Sportshynyń karerasy óner adam­daryna qaraǵanda qysqa bolady. Boksshylarǵa 30 jastan asqan soń, sharshy alańda 12 raýnd judyryqtasyp júrý ońaıǵa soqpaıdy. Qazir Qanattyń jasy 32-de. Bıyl 33-ke tolady. Sondyqtan chempıondyq belbeýge talasqanyn qalaımyz. Áıtpese ýaqyt ótip barady. Bul joly Qanat boks keshiniń basty jekpe-jeginde emes, kishi Roı Djons pen Bobbı Gannı kezdesýiniń anderkardynda óner kórsetti. Qarsylasy osyǵan deıin sharshy alańǵa 19 ret shyqqan. Onyń ishinde 16 jekpe-jekte jeńiske jetip, úsh ret utylǵan. Kásipqoı boksta júrgenine on jyldan asqan. AQSh-ta alǵash ret judyryqtasty. Buǵan deıin eki ret Kanadada, bir ret Jańa Zelandııada, qalǵan kezdesýlerin óz elinde ótkizgen. Álemdik reıtıngtegi kórsetkishi de asa máz emes (boxrec.com saıtynda 240-oryn). Jerlesimizge Robsondy utý qıynǵa soqpady. Birin­shi raýndta-aq sula­typ saldy. Sóıtip, qazaq boksshysy sport­tyq mansabynda 23-jeńisine qol jetkizdi. Osyndaı kezdesýdiń Qanatqa abyroı ápere qoımaıtynyn Qazaqstan kásipqoı boks federasııasynyń vıse-prezıdenti Vıktor Demıanenko «Vesti.kz» saıtyna bergen suhbatynda aıtypty. – Mundaı jekpe-jek Qanat Islamǵa qajet emes. Jańa bıikke kóterilý úshin deńgeıi joǵary boksshylarmen jolyq­qany durys. Qazirgi qarsylasy birneshe márte jeńilgen, reıtıngi de joǵary emes. Mundaı qarsylas ne úshin kerek? Jalpy, osyndaı kezdesýler Qanatqa ne beredi? – deıdi Demıanenko. Bul kásibı mamannyń janashyr­lyqpen aıtqan pikiri dep oılaımyz. Qazaq halqy batyr ulyn jaqsy kóredi. Onyń tolaǵaı tabystarǵa qol jetkiz­genin, álemdik arenada baǵy janǵanyn kórgisi keledi. Endeshe, Qanat jáne onyń promoýteriniń oılanǵany durys bolatyn shyǵar. Bek TО́LEÝOV, jýrnalıst ASTANA