Japonııada Azıada jalaýy jelbiredi

Keshe Japonııanyń Sapporo qalasynda VIII qysqy Azııa oıyndary saltanatty túrde ashylyp, aq qar, kók muz ústindegi alamannyń alaýy jaǵyldy. «Sapporo-doým» stadıonynda ótken dýmandy sherýde Qazaqstannyń kók týyn shańǵyshy, elimizdiń bes dúrkin chempıony Erdos Ahmadıev ustap shyqty. Sary qurlyqtyń qystaǵy basty saıysynda Qazaqstannyń namysyn 116 sportshy qorǵaıtyn bolady. Jalpy, Aq Azıada dodasynda 31 eldiń atynan keletin atletter sporttyń 11 túri boıynsha 64 medal jıyntyǵy úshin kúsh synasady. Sapporo saparyna Qazaqstan delegasııasyn bastap barǵan Qazaqstan Respýblıkasy Mádenıet jáne sport mınıstrligi Sport jáne dene shy­nyqtyrý isteri komıtetiniń tóraǵasy Elsııar Qanaǵatovtyń aıtýynsha, bizdiń sportshylar bul oıyndarǵa keı sport túrleri boıynsha ekinshi qurammen attanǵan. Onyń sebebi, bizdiń kóshbasshy sportshylarymyz dál osy ýaqyt aralyǵynda birqatar sport túrleri boıynsha ótetin álem chempıonattary men Álem kýbogy kezeńderinde óner kórsetedi eken. Soǵan qaramastan, qurama sapynda mánerlep syrǵanaýshylar Denıs Ten, Elızabet Tursynbaeva, konkımen júgirýshiler Roman Krech, Denıs Kýzın, Ekaterına Aıdova, Dmıtrıı Babenko, frıstaıl-mogýlshy Dmıtrıı Reıhard, bıatlonshylar Alına Raıkova, Galına Vıshnevskaıa, shańǵyshy Nıkolaı Chebotko, short-trekshi Aıdar Bekjanov, shańǵymen tuǵyrdan sekirýshi Marat Japarov syndy tájirıbeli sportshylar bar. Eske salar bolsaq, 2011 jyly Astana men Almatyda ótken VII qysqy Azııa oıyndarynda Qazaqstan qurama komandasy jalpy sany 32 medal alyp, komandalar arasyndaǵy básekede birinshi orynǵa ıe bolǵan-tyn. Al 19-26 aqpan aralyǵynda Sapporoda ótetin sary qurlyqtyń bul basty saıysynda bizdiń sportshylarymyzdyń aldyna úzdik úshtiktiń ishinde bolý mindeti qoıylǵan. Qaırat ÁBILDINOV, «Egemen Qazaqstan»