Soltústik sportynda serpilis bar

Keıingi jyldary Soltústik Qazaqstan oblysynda sport salasyna jan-jaqty kóńil bólinip keledi. Sonyń nátıjesinde óńirde kóptegen sporttyq nysandar boı kóterip, salamatty ómir saltyn qalaǵan jurttyń ıgiligine jumys isteı bastady. Oblys sportshylarynyń da halyqaralyq, el ishindegi jarystarda kórsetip júrgen nátıjeleri de aýyz toltyryp aıtarlyqtaı. Oblystyq dene shynyqtyrý jáne sport basqarmasynyń basshysy Rýslan ESENALINMEN áńgime barysynda buǵan kózimiz anyq jetti. – Rýslan Baqyttyuly, búginde óńir turǵyndarynyń úshten birine jýyǵy buqa­ra­lyq sport túrlerimen aına­lysatyn kórinedi. Bul deń­geıge qalaı jettińizder? – Prezıdentimiz 2020 jylǵa deıin Qazaqstan halqynyń 30 paıyzy buqaralyq sportqa tartylýy tıis degen mindet qoıdy. Biz bul mejeni eńserý jolynda tııanaqty túrde jumys istep jatyrmyz. Sońǵy jyldary materıaldyq-tehnıkalyq baza, kadrlyq áleýet áldeqaıda nyǵaıdy. Jańa sport nysandary kóptep boı kóterdi. Qalpyna keltirilgenderi de jetkilikti. Oblysta 1994 jyly 9 Balalar men jasóspirimder sport mektebi (BJSM), 1403 sport ǵımaraty bolsa, qazir olardyń sany, sáıkesinshe 26-ǵa jáne 2816-ǵa jetti. Osydan eki jyl buryn arnaıy baǵdarlama túzilip, aýdandar men eldi mekenderdiń jaǵdaıyna basa nazar aýdaryldy. Beskól, Jarken, Novoıshım eldi mekenderinde kópbeıindi dene shynyqtyrý-saýyqtyrý keshenderi, júzý basseınderi salyndy. Jýyrda Jańajol, Novonıkolskoe aýyldarynda, Sergeevka kentinde jańa úlgidegi sport ǵımarattary paıdalanýǵa berildi. Sońǵy eki jylda ǵana 393 hokkeı korty salyndy. Memleket-jekemenshik áriptestik úlken qoldaý kórsetip otyr. Esil, Aıyrtaý, Aqjar aýdandarynda demeýshilerdiń kómegimen jabyq muz aıdyndary turǵyzyldy. Beskól kentinde, oblys ortalyǵynda gımnas­tıka jáne olımpııalyq sport túrlerine arnalǵan alańdar osy zaman úlgisimen jabdyqtaldy. 46 fýtbol alańy jańartyldy. О́tken ǵasyrdyń 70-jyldarynan beri qyzmet kórsetip kele jatsa da, esh jóndeý kórmegen «Qarasaı batyr» stadıony qalpyna keltirildi. «Neptýn» akvaparkinde júzý basseıni, jattyǵý alańy, sport zaldary jumys isteıdi. – Oblys ortalyǵynda A.Vınokýrov atyndaǵy sport saraıynyń jurtshylyq ıgi­ligine berilýin basty oqıǵa­nyń birine jatqyzýǵa bolatyn shyǵar? – Árıne. Keshenniń ashylýyn úlken-kishiniń taǵatsyzdana kútkeni ras. Onyń qurylysyna 3 mıllıard teńge mólsherinde qarjy jumsaldy. Munda sport­tyń 12 túrimen erkin aı­na­lysýǵa bolady. Jabyq muz aıdyny, jeńil atletıka maneji, velotrek alańdary ornalasqan. Endi onyń janynan ámbebap tennıs ortalyǵyn ashý josparlanǵan. Buǵan qosarym, sýǵa jú­zý, akrobatıka, boks, ult­tyq oı­yndar, gımnastıka, at sporty, taǵy basqa sport tú­leri boıynsha balalar já­ne jasóspirimder sport mek­tep­teriniń fılıaldary molaıyp, aýyldyq jerlerde keńinen qanat jaıa tústi. Joǵary sport she­berligi mektebi 2009 jyldan beri 15 halyqaralyq dárejegi sport sheberi men 34 sport sheberin daıyndap shyqty. – Kásibı sport klýb­tary­nyń aıaq alysy qalaı? – «Qyzyljar SK» fýtbol komandasy birinshi lıga qura­mynda úshinshi oryndy ıelenip, jankúıerlerin qýanyshqa bó­ledi. Voleıbolshylarymyz da osal emes. Kezinde Qazaqstan kýbogyn jeńip alǵanyn, tórt márte ekinshi oryn alǵanyn eskersek, olardan úlken je­ńis­ter kúterimiz zańdy. Kileń jergilikti oıynshylardan quralǵan «Qýanysh» qyzdar ko­mandasynyń aıaq alysy qýan­tady. Azııa oıyndarynyń júldegeri Mıhaıl Dedov jat­tyqtyratyn basketbolshylarymyz joǵary lıgada jaqsy oıyn órnegin kórsetip júr. 2015 jyly qurylǵan «Qulager» hokkeı klýby týraly sóz erekshe. Sol jyly qola medaldy qanjyǵaǵa baılasa, byltyr el kýbogyn jeńip aldy. «Vino4ever SKO» veloshabandozdar klýbynyń ataǵy shet elge de jaqsy tanys. Qazir azııalyq komandalar arasynda reıtıng boıynsha aldyńǵy orynda tur. «Úmit» múgedekter klýbynyń Sergeı Harlamov, Elena Mazýrenko, Qaırat Qanafın, Vladımır Erman sekildi beldi músheleri paralımpııalyq oıyndarǵa qatysyp júr. – Olımpıada chempıony Aleksandr Vınokýrov sekildi oblystyń, elimizdiń namysyn abyroımen qorǵap júrgen aıbyndy sportshylarymyz kimder? – Byltyr Brazılııada ótken baıraqty básekege 6 jerlesimiz qatysty. Olardyń arasynan bokstan Darıǵa Shákimova, ob­ly­symyzdyń týmasy, erkin kúres sheberi Elmıra Syz­dy­qova qola júldege ıe boldy. Táýelsizdigimizdiń 25 jyldyǵy aralyǵynda Olımpııalyq oı­yndarǵa qatysqan Nurym Dúı­senov, Roman Meleshın, Vadım Shaqshaqbaev, Vladıslav Polıa­kov, Baqtııar Qojataev, Mar­garıta Muqasheva, Eka­terı­na Ektova, Dmıtrıı Ba­ben­ko, taǵy basqalarynyń esim­­deri qurmetpen atalady. Alek­san­drdyń izbasary Alek­seı Lý­senko ótken jyly «Týr Haı­nanıa» halyqaralyq jarysynda aldyna jan salmady. Buǵan jerlesimiz, kásipqoı boksshy Janat Jaqııanovtyń jaqynda WBA /Super/ jáne IBO tujyrymdary boıynsha jeńil salmaqta álem chempıony atanǵanyn aıtsaq, tabysy­myzdyń eselene túseri anyq. Iаǵnı, búgingi kúnde soltústik óńir­diń sportynda úlken serpi­lis bar dep senimmen aıtýǵa bo­lady. – Áńgimeńizge rahmet. Áńgimelesken О́mir ESQALI, «Egemen Qazaqstan» Soltústik Qazaqstan oblysy