Toǵyz jyl buryn aty qoıylǵan kitaphanaǵa tólqujat endi berildi

Bir qyzyǵy, Keńes ókimeti kezinde A.Gaıdar atyn ıemdengen bul kitaphanaǵa Hamza Esenjanovtyń esimi jazýshynyń 100 jyldyǵy qarsańynda, ıaǵnı 2008 jyly berilgen bolatyn. Sodan beri túrli jıyndarda, tipti baspasóz betinde «Hamza kitaphanasy» atalǵanymen, kitap ordasynyń «kýáligi» osy kezge deıin ózgermegen eken. Jaqynda ǵana Úkimettiń №827 qaýlysyna sáıkes oblystyq balalar jáne jasóspirimder kommýnaldy memlekettik mekemesi «Batys Qazaqstan oblysynyń mádenıet, arhıvter jáne qujattama basqarmasy, Hamza Esen­janov atyndaǵy oblystyq balalar jáne jas­óspirimder kitaphanasy» bolyp ózgertildi. Kitaphana ujymy bul ataýly kúndi saltanatty jıynmen atap ótti. О́miriniń 20 jylyn aıdaýda ótkizgen qaısar jazýshy týraly estelikter aıtyldy. Mahambet atyndaǵy Batys Qazaqstan memlekettik ýnıversıtetiniń stýdentteri «Aq Jaıyq» trılogııasynan sahnalyq kórinister qoıdy. Patshaly Reseı jáne Keńes bıligi kezinde otarlyq orystandyrý ortalyǵynyń biri bolǵan Oral qalasynda ózgeris kútip turǵan ataýlar áli kóp. Oblys ortalyǵynyń irgesindegi eldi­mekender tutasymen ózge tilde shúldirlep tur. Qazbek QUTTYMURATULY, «Egemen Qazaqstan» ORAL