Fermerlerge sýbsıdııa berý tetikteri qaıta qaralady

Vıse-Premer – Aýyl sharýashylyǵy mınıstri OQO aýyl sharýashylyǵy kooperatıvteriniń jumysymen tanysty, dep jazady Aýyl sharýashylyǵy mınıstrliginiń resmı saıty.

Vıse-Premer – Aýyl sharýashylyǵy mınıstri 72 JQSh men 10 sharýa qojalyqty biriktirgen «Et Agro Mankent» aýyl sharýashylyǵy kooperatıvine bardy. Atalmysh kooperatıv jylyna 7 myń tonnaǵa jýyq et óndiredi. «AО́K-tiń el ekonomıkasynyń draıveri retinde qalyptasýynda aýyl sharýashylyǵy kooperatıvteriniń orny zor. Onyń áleýetin paıdalaný arqyly aýyldy kóterýge bolady. Kooperasııa – aýyl bolashaǵy», – dep atap ótti A.Myrzahmetov. Elbasy tapsyrmasyna sáıkes memlekettik qoldaý sharalary qaıta qarastyrylýda. Qazirgi tańda 11 tıimsiz sýbsıdııa túri alyp tastalyp, 35 sýbsıdııa túriniń normatıvterine ózgerister engizilýde. Nátıjesinde, sol bıýdjet kólemi arqyly óndirýshilerdiń, onyń ishinde, eń aldymen, usaq sharýashylyqtar men kooperatıvterdiń memlekettik qoldaý sharalarymen qamtylýy 7,5 esege (67 myńnan 500 myńǵa deıin) ulǵaıady. Aýyl sharýashylyǵy kooperatıvterin qurýdaǵy belsendilikti arttyrý úshin Mınıstrlik tarapynan sút qabyldaý jáne mal bordaqylaý pýnktterin alǵashqy jarnasyz ıelený shemasy jasaldy. Oǵan sáıkes «Aýyl sharýashylyǵyn qarjylaı qoldaý qory» AQ arqyly lızıngke berý qarastyrylǵan. Iаǵnı, alǵashqy jarnaǵa ınvestısııalyq sýbsıdııanyń jalpy baǵasynyń 50 paıyzyn paıdalaný qarastyrylýda. Sondaı-aq, memleket tarapynan kooperatıvterge tapsyrylǵan 1 lıtr sútke 10 teńge berilmek. Iri qara mal basyna 20 myń teńge jáne usaq malǵa 1500 teńge. Aıta keteıik, Memleket basshysynyń tapsyrmalaryn oryndaý maqsatynda elimizdiń barlyq aımaǵynda aýyl sharýashylyǵy kooperatıvterin qurý boıynsha túsindirý jumystary júrgizildi. Bıyl 250 aýyl sharýashylyǵy kooperatıvin qurý josparlanýda. Budan bólek, aýyl sharýashylyǵy óndirýshileri úshin aqparattyq-konsýltatıvtik turǵyda Fermers.kz saıty men call-ortalyǵy (barlyq baǵyttardan qońyraý shalý tegin) qyzmet kórsetýde. Jalpylaı alǵanda, OQO aýmaǵynda 2017 jylǵa arnalǵan is-sharalar josparyna sáıkes 18 aýyl sharýashylyǵy kooperatıvi, 15 sút qabyldaý pýnkti, 429 otbasylyq mal bordaqylaý alańy, 4 mal soıý pýnkti, 5 jemis-kókenis ázirleý pýnkti jáne 75 otbasylyq jylyjaı ázirleý josparlanýda. Budan keıin, Vıse-Premer «Nurly jol» baǵdarlamasy boıynsha Shymkent qalasy, Dostyq shaǵyn aýdanyndaǵy 1200 oryndyq mektep qurylysy barysymen tanysty.