Elordada áleýmettik kómek retinde tis protezdeý qyzmeti tegin usynylady

Jyl saıyn elordada qalalyq máslıhattyń 2014 jyly 27 maýsymdaǵy sheshimimen bekitilgen «Astana qalasynda áleýmettik kómek kórsetý, onyń mólsherin belgileý jáne muqtaj azamattardyń jekelegen sanattarynyń tizbesin aıqyndaý qaǵıdasyna» sáıkes tis protezdeý túrinde tegin qyzmet kórsetý qarastyrylǵan. Bul týraly astana.gov.kz habarlady. Bul jeńildikter Uly Otan soǵysynyń qatysýshylary men múgedekterine, solarǵa teńestirilgen adamdarǵa, zeınetkerlerge, múgedekterge usynylady. Uly Otan soǵysynyń qatysýshylary men múgedekterine qyzmetter kezekten tys kórsetiledi. Qalǵan sanattardaǵy azamattarǵa qyzmetter kezek retimen usynylady. Áleýmettik kómek alý úshin ótinish berýshi Astana qalasynyń jumyspen qamtý, eńbek jáne áleýmettik qorǵaý basqarmasyna ótinishpen birge myna qujattaryn tapsyrýy tıis: jeke kýáliginiń kóshirmesi, meken jaı anyqtamasy, mártebesin rastaıtyn qujattyń kóshirmesi, ýákiletti medısınalyq uıym bergen tis protezdeý qajettiligi jónindegi medısınalyq qorytyndy. Tisti protezdeýge áleýmettik kómek eki jylda bir ret kórsetiledi. Atalǵan áleýmettik kómek sheńberinde medısınalyq kórsetkishter bolǵan jaǵdaıda aýyz qýysyna arnalǵan em-dom sharalary atqarylady. Tolyq aqparat alý úshin Imanbaeva kóshesi, 16, tel. 21-27-14, 21-09-41, 21-29-88 meken jaıy boıynsha Astana qalasynyń jumyspen qamtý, eńbek jáne áleýmettik qorǵaý basqarmasyna habarlasýǵa bolady.