QR Prezıdentiniń jyl saıynǵy «Altyn sapa» baıqaýy bastaldy

Búgin Ortalyq kommýnıkasııalar qyzmetinde ótken baspasóz máslıhatynda Atameken» Ulttyq kásipkerler palatasy basqarma tóraǵasynyń orynbasary Nurjan Áltaev 2017 jylǵy QR Prezıdentiniń «Altyn sapa» baıqaýynyń jáne «Qazaqstannyń úzdik taýary» respýblıkalyq kórme-baıqaýynyń bastalǵanyn jarııalady. Basqarma tóraǵasynyń aıtýynsha, búgingi tańda Qazaqstannyń Búkilálemdik saýda uıymyna kirýiniń arqasynda, sondaı-aq Eýrazııalyq ekonomıkalyq odaq sheńberinde otandyq kásipkerler úshin ónimderin shetelge eksporttaýǵa úlken múmkindik týyp otyr. «Osy oraıda, birinshi kezekte, Elbasy atap ótkendeı, otandyq taýarlardyń sapasy joǵary, básekege qabiletti bolýy tıis. Atalǵan maqsatta Memleket basshysynyń tapsyrmasymen «Atameken» Ulttyq kásipkerler palatasy taýar óndirýmen jáne qyzmet kórsetýmen aınalysatyn ártúrli menshik nysanyndaǵy uıymdar arasynda QR Prezıdentiniń jyl saıynǵy «Altyn sapa» baıqaýyn ótkizedi», – dep atap ótti N.Áltaev. Ol sondaı-aq ótken jyly Elbasy syılyǵy 70-ten astam kompanııaǵa berilgenin jetkizdi. «2016 jyly «Altyn sapa» baıqaýyna 138 kompanııa qatysty, onyń ishinde 59 – shaǵyn kásipkerlik, 47 – orta, 32 – iri kásiporyn. Baıqaý uıymdastyrylǵan ýaqyttan bastap Elbasy syılyǵyn 70-ten astam kompanııa enshiledi. «Atameken» UKP QR Prezıdentiniń «Altyn sapa» baıqaýyn eki jyl qatarynan ótkizip, 25 laýreatty anyqtady», – dedi basqarma tóraǵasynyń orynbasary. Qazaqstan Respýblıkasy Prezıdentiniń Jarlyǵyna sáıkes baıqaýlar jyl saıyn ótkiziledi. Oǵan Qazaqstan Respýblıkasynyń aýmaǵynda taýarlar óndirýmen (qarý-jaraq pen áskerı tehnıka óndirýdi qospaǵanda), qyzmetter kórsetýmen aınalysatyn dara kásipkerler men zańdy tulǵalar qatysa alady. Memlekettiń qatysý úlesi 50 %-dan asatyn uıymdar, sondaı-aq ózderine qatysty belgilengen tártippen ońaltý jáne bankrottyq rásimderin júzege asyrý týraly sheshimder qabyldanǵan uıymdar baıqaýlarǵa qatysa almaıdy. 2016 jyly «Qazaqstannyń úzdik taýary» óńirlik kórme-baıqaýlaryna 674 shaǵyn, orat jine iri kásipkerlik qatysqan, nátıjesinde respýblıkalyq kezeńge 145 jeńimpaz irikteldi. «Qazaqstannyń úzdik taýary» óńirlik kórme-baıqaýy 2001 jyldan bastap ótkizilip keledi. Osy ýaqytqa deıin kórme-baıqaýǵa 5,6 myńnan astam kompanııa qatysyp, olardyń ishinen 115 kásiporyn dıplomant atanǵan. Baıqaýlarǵa qatysýǵa nıet bildirgen tulǵalar 2017 jyldyń 1 shildesine deıin óńirlik kásipkerler palatalaryna Konkýrstarǵa qatysýshylardyń materıaldaryn resimdeý, usyný jáne aldyn ala baǵalaý erejelerine sáıkes ótinim men materıaldardy tapsyrýy tıis. «Altyn sapa» men «Qazaqstannyń úzdik taýary» baıqaýlarynyń barlyq laýreattary tórt jyl boıy baıqaýdyń emblemasyn jarnama maqsatynda paıdalana alady», – dedi N.Áltaev. Aıdar О́risbaev, "Egemen Qazaqstan"