Qazaqstanda "sandyq fabrıkalar" paıda bolady

Indýstrııa 4.0 tehnologııasynyń Qazaqstan úshin qosymsha múmkindikter ákeletinin kóremiz. Osynyń arqasynda shaǵyn ishki naryq, teńiz saýda joldarynyń qashyqtyǵynan shyǵa almaý, bilikti jumys kúshiniń tapshylyǵy sııaqty obektıvti faktorlardyń áserin tómendete alamyz. Bul týraly QR Investısııalar jáne damý mınıstri Jeńis Qasymbek mınıstrliktiń alqa májilisinde málimdedi. Indýstrııa 4.0 tehnologııasynyń elementterin belsendi túrde engizý maqsatynda mınıstrlik bıylǵa jáne kelesi jylǵa qadamdy jospar ázirledi. Mınıstrdiń aıtýynsha, Qazaqstan jaǵdaıynda Indýstrııa 4.0 tehnologııasynyń máni men mańyzyn qalyptastyrý máselesi tur. Bul úshin bıyl halyqaralyq tájirıbege sáıkes aǵymdaǵy jaǵdaıǵa tolyqqandy saraptama jasalady jáne Indýstrııa 4.0. tehnologııasynyń elementterin ónerkásipke engizý daıyndyǵy pysyqtalady. Bul jumys joǵary bilikti sheteldik seriktestermen birlese jasalatyn bolady. Mınıstrlik alǵashqyda shoǵyrlandyrýǵa bolatyn 3-4 ónerkásip sektoryn anyqtaýdy josparlap otyr. Ár sektorǵa yntalandyrý jónindegi naqty qoldaý is-sharalarynyń jıyntyǵy jáne mindetti túrde ázirleý kerek standarttar tizimi belgilmek. «Bıyl saraptama qorytyndysy boıynsha  demonstrasııalyq tıimdilikke qol jetkizý maqsatynda aldyńǵy qatarly sandyq tehnologııany engizý úshin 7-10 pılottyq kásiporyn irikteletin bolady. Bir sózben aıtqanda, atalmysh kásiporyndar basqa kásiporyndar úshin «modeldi sandyq fabrıka» úlgisi rólin atqarady. Pılottyq jobalar jónindegi jumystar 2018 jyly da jalǵasady»,-dep atap ótti mınıstr Jeńis Qasymbek. Sonymen qatar, sandyq tehnologııany engizý boıynsha júıequraýshy kásiporyndarmen de jumys kúsheıtilmek. Búginniń ózinde birqatar kompanııalar jańa sandyq sheshimderdi engizýge qyzyǵýshylyq tanytyp, iske kirisip te ketti. Bul jerdegi bosatylǵan jumys kúshi men eńbek naryǵyndaǵy ózgeristerdi boljaý esebinen sandyq tehnologııa negizinde modernızasııalaý josparyn ázirleý men júzege asyrýda mınıstrlik negizgi mindetti atqarady. Barlyq kórsetilgen sharalar 2017 jyldyń jeltoqsanynda qabyldanýy josparlanǵan 2025 jylǵa deıingi bazalyq sektorlardy tehnologııalyq modernızasııalaý jónindegi Keshendi josparǵa bekitiletin bolady.