Shahar kórkin ádemi aıaldama da ashady

Almaty, Astanadaǵydaı kólik keptelisine halqynyń sany bir mıllıonǵa jetken Shymkent turǵyndary da úırenip qaldy. Halyq kóp, mashına kóp. Biraq, basqalaı retsizdikter halyqtyń mazasyn alýda. Turar Rysqulov pen Báıdibek bı dańǵylynyń qıylysqan tusynda qoǵamdyq kólikter men taksıs­ter sharshy jer qaldyrmaı ıin tiresip turady. Ári qaraıǵy aýyldarǵa jol júretin adamdar da óte kóp. Bajyldaǵan kólik, qol kótergen jolaýshy. Kesh­qurym bul jerden óz kóligińmen ótý qıynnyń qıyny. Shymkent qalasynyń qoǵamdyq kelisim máji­lisinde OQO kásipodaqtar keńesiniń tóraǵasy Ǵanı Qarabekov osy suraqty qala ákimi Ǵabıdolla Ábdira­hymovqa qoıdy. «Kómeshbulaq, Qatynkópir, Leńgir jáne Gıper Haýs taksoparkterindegi retsizdikti qalaı sheshýge bolady?» degen suraqqa qala ákimi bylaı dep jaýa­p berdi: – Atalǵan taksoparkter qoǵamdyq kólik qozǵalysy men jolaýshylarǵa kóp kedergi keltirýde. Eki apta buryn dál osy másele boıynsha arnaıy jınalys ótkizgen bolatynbyz. Ol parkterdi eýropalyq qalalardyń úlgisine saı jańartpaqshymyz. Bul avtoparkterge tek arnaıy tirkelgen marshrýttar ǵana kire alady. Al jolaýshylar emin-erkin, eshqandaı kedergisiz kirip-shyǵatyn bolady. Dál qazirgi jaǵdaıda joǵaryda atalǵan taksoparkterdiń máselesine tyıym sala almaımyz. Arnaıy jol belgilerin ornatý arqyly retteımiz, – dedi ákim. Sonymen qatar, aıaldama máselesine de pikirin bildirdi. – Aldaǵy 2 aıdyń ishinde qala boıynsha 104 jańa aıaldama ornatylatyn bolady. Onyń basym kópshiligi qalaǵa jańadan qosylǵan eldi mekenderge tıesili. Keıbir aıaldamalar dúkenge aınalyp ketken. Biz aıaldama basshylaryna bir-aq talap qoıyp otyrmyz. Aıaldama sáýlet jáne qala qurylysy basqarmasynyń jobasynyń negizinde salynýǵa tıis. О́ıtkeni, ol – qala kórki. Árqaısysy ózimbilermendikke salsa, shahar kelbetine áser etýi múmkin, – dedi qala ákimi. Baqtııar TAIJAN, «Egemen Qazaqstan» Ońtústik Qazaqstan oblysy