• 20 Aqpan, 2017

Kóktemgi sý tasqynynyń aldyn alý jumystary bastaldy

473 ret

kórsetildi

3 mın

oqý úshin

Egemen Qazaqstan

Búgin Ońtústik Qazaqstan oblysynyń ákimi J.Túımebaevtyń tóraǵalyǵymen oblys aýmaǵynda kóktemgi sý tasqynyn aldyn alý jumystary boıynsha OQO tótenshe jaǵdaılar departamenti qyzmeti men aýdan, qala ákimderiniń qatysýymen selektorlyq májilis ótti. Jıynda óńirdegi sý qoımalardyń ahýaly, kóktemgi sý basýǵa, sel, qar kóshkini jáne syrǵymalardyń aldyn alýdy qamtamasyz etý boıynsha daıyndyq is-sharalary qaraldy. Onda OQO tótenshe jaǵdaılar departamentiniń bastyǵy N.Derbısov búginde sý tasý qaýpi bar degen Shardara, Kóksaraı sý rettegishi jáne oblys aýmaǵynan ótetin Syrdarııa ózenine zertteý jumystary júrgizilgenin baıandady. Zertteý nátıjesinde Shardara sý qoımasyna 4 mlrd.077 mln. m3 sý jınalǵany anyqtalǵan. Tolýy 78% -dy qurap otyr. Táýligine kelip jatqan 1500 tekshe metr sýdy esepke alǵanda, sý tolý qaýpi bar. Qoıma tolǵan ýaqytta artyq sý Syrdarııa ózenine tastaý josparlanýda. Osy rette, «Qazsýshar» RMK OQO fılıalynyń dırektory M.Egenov Kazgıprovodhoz mekemesi 28 aqpanǵa deıin Shardara sý qoımasyna 5 mlrd. 200 m3 sý jınaýǵa ruqsat berýi múmkin ekendigin aıtty. «Apta ishinde Tótenshe jaǵdaılar departamentine 3 daýyldy eskertý túsken. Ol boıynsha qala, aýdan ákimderine joǵary ázirlik rejımine ótý jáne aýmaqty daıyndyqqa keltirý jóninde nusqaýlyq hattar joldanyp, radıo, telearnalar men uıaly telefonǵa SMS habarlama arqyly halyq qulaqtandyrylǵan»,-dedi N.Derbısov. Májiliste sóz alǵan óńir basshysy kún tártibinde kóterilgen másele boıynsha ár aýdanda atqarylyp jatqan jumystardy pysyqtap, birqatar naqty tapsyrmalar berdi. Sondaı-aq, ákim jaýyn-shashyn kezinde aryq-atyzdar arnasynan tasyp, keıbir kóshelerdi sý basatynyn. Bul shahardaǵy ırrıgasııalyq júıelerdiń durys istemeıtindiginiń saldarynan oryn alyp otyrǵan jaǵdaı ekenin aıtty. Osy tusta J.Túımebaev qala ákimine Shymkentke qosylǵan eldi mekenderdiń kartasyn ázirlep, aryq atyzdar salý úshin zertteý jumystaryn júrgizýdi tapsyrdy. Sonymen qatar, oblys pen qalaǵa shahardyń ırrıgasııalyq júıesin retteý maqsatynda arnaıy karta shemasyn daıyndaýdy júktedi. Jıyndy qorytyndylaǵan aımaq basshysy ózender men sý qoımalaryna kúndelikti monıtorıng júrgizip, qatań baqylaýǵa alýdy. Tótenshe jaǵdaılar oryn alǵan kezde málimetter shuǵyl túrde oblys ákiminiń apparatyna jáne tótenshe jaǵdaılar departamentine usynýdy. Sý qoımalarynyń qaýipsiz toltyrý rejıminiń saqtalaýyn qamtamasyz etýdi jáne aýdan, qalalardyń qaýipti aımaqtaryndaǵy qorǵanys bógetterin tekserýdi. Tótenshe jaǵdaı oryn alýy múmkin aım¬aqtardaǵy halyqqa aqparattyq túsindirý jumystaryn júrgizip, ózenderden bastaý al¬atyn arnalardy shuǵyl tazalap, kez kelgen jaǵdaı úshin qajetti quraldardyń daıyn bolýyn tapsyrdy. Sondaı-aq, ákim tótenshe jaǵdaı kezinde árbir úıdi saqtap qalý jaǵdaıyn qarastyrýdy nazarǵa alyp, kóktemgi sý tasqynyn boldyrmaýdyń barlyq múmkindigin qarastyrý qajettigin osy salaǵa jaýapty orynbasary J.Bókenbaevqa mindettedi. "Kazgıdromettiń" habarlaýynsha, aldaǵy bir aıda oblysta jylylyq +15 gradýsqa deıin kóteriledi. Al taýly aımaqtarda 1,5 metrge deıin qar jatyr. Biraq qardyń kúrt erý qaýpi joq.