OQO-da aldaǵy 5 jylda 205 mektep salynady

Ońtústik Qazaqstan oblysynda aldaǵy 5 jylda 205 mektep salynady. Sondaı-aq beıimdelgen ǵımaratta ornalasqan bilim oshaqtary men úsh aýysymda bilim beretin mektepterdiń qatary azaıady, -dep habarlaıdy QazAqparat. Statıstıka málimetterge súıensek, elimizde árbir besinshi bala Ońtústik Qazaqstan oblysynda týady. Bir jylda óńirde 70 myńnan astam sábı dúnıege keledi. Osy kórsetkishke qarap, sońǵy jyldary oblystaǵy halyq ósimi jyl sanap artyp otyrǵandyǵyn baıqaýǵa bolady. Iаǵnı, Ońtústik Qazaqstan oblysy demografııalyq damý jaǵynan respýblıkada aldyńǵy qatarda. Nátıjesinde jyl saıyn mektepterdegi oqýshylar sany shamamen 30 myńǵa ósken. Oblystaǵy 1021 mekteptiń 256-sy beıimdelgen ǵımaratta ornalassa, onyń 82-si samannan salynǵan. 31 eldi mekende mektep joq. Al, 29 mektep úsh aýysymǵa ótýdiń aldynda tur. Osy kúrmeýli máselelerdi sheshý maqsatynda aldaǵy 5 jylda oblysta 205 mektep salynbaq. Budan bólek, «Balapan» baǵdarlamasy aıasynda 3 pen 6 jas aralyǵyndaǵy balalardy mektepke deıingi uıymdarmen qamtý máselesi memlekettik- jekemenshik áriptestik aıasynda sheshimin tabady. Osy bastamanyń arqasynda aldaǵy 3 jylda balalardy balabaqshamen qamtý deńgeıin 100 paıyzǵa jetkizý josparlanyp otyr.