Tımýr Qulybaev pen Iran UOK basshysy memorandýmǵa qol qoıdy

VIII qysqy Azııa oıyndary ótip jatqan Japonııanyń Sapporo qalasynda Qazaqstan Respýblıkasy Ulttyq Olımpıada komıtetiniń prezıdenti Tımýr Qulybaev Iran Ulttyq Olımpıada komıtetiniń basshysy Kýmars Hashemı myrzamen kezdesti. Kezdesý barysynda taraptar sportty birlese otyryp damytý jónindegi memorandýmǵa qol qoıdy. Aldaǵy ýaqytta eki el sportshylary ózara tájirıbe almasyp, birlesken oqý-jattyǵý jıyndaryn ótkizetin bolady. Búgingi kúnde Iran memleketiniń sporty qarqyndy túrde damyp keledi. Atap aıtqanda, osy eldiń balýandary men ziltemirshileri álemdik dodalarda tamasha nátıjelerge qol jetkizip júr. Sondaı-aq, qazirgi tańda Iran eldegi sporttyq ınfraqurylymdy damytý máselesine de jetkilikti túrde kóńil bóle bastaǵan. Áriptester mundaı ıgi qadamnyń eki jaqqa da paıdasy tıip, mindetti túrde oń nátıje bererine senim bildirdi.