Qoǵamdyq keńes Zeınetaqy qorynyń 50 mlrd teńgesin temir jolǵa berýin túsindirýdi suraýda

Birińǵaı jınaqtaýshy zeınetaqy qory (BJZQ) Qoǵamdyq keńesi Ulttyq bank tóraǵasy Danııar Aqyshev pen BJZQ tóraıymy Nubıbi Naýryzbaevanyń atyna temir jol salasyn qoldaý úshin zeınetaqy qoryndaǵy 50 mlrd teńgeniń bólinýine túsinikteme berýin surap otyr. Resmı saýalda 8 bap bar:

1. Bul aqparat shyndyqqa qanshalyqty janasady? Bul sheshimdi kim jáne qashan qabyldady?

2. Eger aqparat ras bolsa, bul qarjyny qaı kompanııalar ala alady jáne ony alý sharttary qandaı? 3. Qor aksıoneri jáne quryltaıshysy QR Úkimeti, ıaǵnı QR Qarjy mınıstrliginiń "Memlekettik múlik jáne jekeshelendirý komıteti" MM jáne Ulttyq bank osy qarjynyń berilýine kelisim berdi me? 4. Zeınetaqy aktıvterin kompanııalardyń alýy úshin ótinishti qabyldaý tártibi, irikteý tártibi qandaı? Jáne eń bastysy, qarjynyń qaıtarylatynyna kepildik bar ma? 5. Investısııalyq sheshim qabyldaýdyń tetigi qandaı? Ony bergennen keıin qarjynyń kóbeıetini týraly qandaı senim bar? 6. Salymshylar turǵysynan mundaı ınvestısııa qordyń ınvestısııalyq deklarasııasyna qanshalyqty saı keledi? 7. Osy aktıvterdi paıdalanýda qandaı emıtentter, vedomstvalar men memlekettik baǵdarlamalar qatysady? 8. Zeınetaqy aktıvteriniń qor qurylǵannan bergi, ıaǵnı 2014 jyldan bergi qandaı jobalarǵa ınvestısııa salynǵany týraly tolyq málimet berýlerińizdi suraımyn. Aıta keteıik, búgin Zeınetaqy qorynan 50 mlrd teńge eldiń temir jol salasyna bólinetini týraly habarlaǵan edik.