Qar kóshkininen qaza tapqan áskerılerdiń otbasylaryna 7 mln teńgege deıin ótemaqy tólenedi

Jambyl oblysynda qar kóshkininen qaza tapqan áskerı qyzmetshilerdiń otbasylaryna 7 mln teńgege deıin ótemaqy tólenedi. Bul týraly búgin QR Úkimeti otyrysynda QR Qorǵanys mınıstri Sáken Jasuzaqov málim etti, dep habarlaıdy QazAqparat. «Qaza tapqandardyń otbasylaryna qarjylaı jáne moraldyq qoldaý kórsetildi. Munan bólek, árbir otbasyǵa 5 jyldyq aqshalaı tabys kólemindegi bir rettik ótemaqy tólenetin bolady. Ol ortasha eseppen shamamen 4-ten 7 mıllıon teńge kóleminde bolmaq. Qazir ol jaqta tergeý organdarynyń ókilderi jumys isteýde. Naqty qorytyndy komıssııa jumysy aıaqtalǵan soń jazbasha túrde beriledi», - dedi S.Jasuzaqov. Eske sala keteıik, aqpannyń 17-si kúni Jambyl oblysy Jýaly aýdanyndaǵy Kóksaı shatqalynda bolǵan qar kóshkini kezinde áskerı daıyndyqtaryn júrgizgen jaýyngerler zardap shekti. 16 adam qutqarylsa, 7 sarbaz qaza tapty.