Bizge keıde basqalardyń ómiri úshin óz basyn báıgege tige alatyn kózsiz batyrlardyń zamany ótip ketkendeı kórinetini bar. Biraq tolǵaýy toqsan tirshiliktegi tolyp jatqan tosyn oqıǵalar osy oıymyzdy teriske shyǵaratyn kezder de jıi kezdesedi. Apat jaǵdaıyndaǵy adam toly áýe kemesin asqan sheberlikpen aman-esen qondyrǵan ushqysh, qaramaǵyndaǵy sarbazdarǵa tóteleı tóngen qaýip-qaterdiń betin qaıtarý úshin jarylǵan granatany keýdesimen japqan komandır, otqa oranǵan úıdiń turǵyndaryn qutqarý maqsatymen tilsiz jaýmen arpalysqan órt sóndirýshi sekildi kúnde qasymyzda júrgen qarapaıym qaharmandar qandaı qurmetke de laıyq. Synalar sátte syr bermegen sondaı soıy bólek azamattardyń qataryna jaqynda ǵana janqııarlyqpen erlik jasaǵan pavlodarlyq polıseılerdi qossaq, qatelese qoımaspyz.
Aqpan aıynyń 17-si kúni oblys ortalyǵynda ótetin jas shahmatshylar jarysyna baratyn baıanaýyldyq balalar men olardyń jattyqtyrýshylary otyrǵan avtobýs júıtkip kele jatty. Jol uzaq, árkim óz oıymen álek. Sirá, alda bolatyn sharshy taqtadaǵy shaıqastar sanaǵa álden salmaq túsiretin sekildi. Anda-sanda jandaryndaǵy aǵaılarynan áldenelerdi surap qoıady. Keıbireýleri alańsyz uıqyǵa ketken. Qaperlerine eshteńe kirer emes.
Kenet tars etken qorqynyshty dybys shyqty da aldyńǵy jaqta otyrǵandardyń biri úreıli únmen shyńǵyryp jiberdi. Terezeler byt-shyt bolyp, joǵarydaǵy sórede turǵan sómkeler tómenge qulady. Ashy aıǵaı men jylap-syqtaǵan daýystardan qulaq tundy. Bastapqyda balalar ne bolyp, ne qoıǵanyn túsinbeı qaldy. О́zderiniń ólim aýzynan qalǵandaryn keıin bildi.
Apat aıtyp kelmeıtini aıan. Bul joly da solaı boldy. Avtobýsty bastap alyp kele jatqan patrýldik avtomashınadaǵy Baıanaýyl aýdandyq ishki ister bóliminiń qyzmetkerleri Murat Nurpeıisov pen Baıanbek Júnisovtiń de oıynda eshqandaı qaýip joq edi. Jerles jetkinshekterdi Pavlodarǵa jetkizip tastap, keri qaıtpaq. Qalqaman aýylynyń tusyna ilingende rýlde otyrǵan Murat qarsy aldarynan jaqyndap qalǵan «KamAZ»-dy kórdi. Alǵashynda abdyraǵanmen boıyn tez jınap úlgerdi. Júz kúdik jaýlaǵan sanasynda jalǵyz úmit jalt etti. «Aýyr soqqyny ózimizge alsaq, avtobýstaǵylar aman qalady. Táýekel...». Janyndaǵy Baıanbektiń janarynan da osy oıdy oqydy.
Qorqynyshty jeńgen qos qyran sóıtip mingen kólikterin sol sátte janalǵyshtaı kóringen dóńgelekti dúleıdiń aldyna kese-kóldeneń tartty.
Oqys oqıǵadan onsha zardap shekpeı esen-saý qalǵan on segiz jetkinshek pen olardyń tórt ustazy búginde ózderin ajaldan arashalap qalǵan ójet polıseılerge alǵystaryn jaýdyryp, aýyr jaraqatpen aýrýhanada jatqan Murat Nurpeıisovtiń jazylyp shyǵýyna tilektestikterin bildirý ústinde.
– Eki azamattyń qyzmet babyndaǵy erlikterin eshqashan umytpaq emespiz, – deıdi Tursyn Sátjanov shákirtteri atynan da jyly lebizin jetkizip.
Pedagogtardyń aıtýynsha, balalarǵa medısınalyq jáne psıhologııalyq kómektiń qajeti bola qoımapty. Oblystyq spartakıadada oıdaǵydaı óner kórsetip, shahmatshylar saıysynda kóshbasshylar qatarynan kórinipti.
Qazir qalalyq №1 aýrýhananyń jansaqtaý bóliminde jatqan Baıanaýyl aýdandyq IIB starshınasy Murat Nurpeıisov taıaýda esin jıyp, eptep tilge keldi. Dárigerler qoldan kelgenniń bárin jasap jatyr. Tıisti ota jasalyp, emdeý sharalary júrgizilýde eken. Konsılıým qorytyndysyna sáıkes, ol endi Astanadaǵy iri medısınalyq mekemelerdiń birine jetkizilýge tıis. Biraq, aýa raıynyń qolaısyzdyǵyna baılanysty bul másele ázirge sheshimin tappaı turǵan tárizdi.
Biz de atalmysh aýrýhanada bolyp, Murattyń jary Áselmen kezdestik. Áńgime ústinde ol jubaıynyń sóılep jatqanyn qýanyshpen jetkizdi.
M.Nurpeıisov 1978 jyly týǵan, ishki ister organdarynda 2001 jyldan beri jumys isteıdi. Úsh balasy bar. Al onyń qasyndaǵy serigi Baıanbek Júnisov jaraqaty jeńildeý ekendigin alǵa tartyp, aq halatty abzal jandardyń járdemine júginbepti.
Al jol apatyna sebepker bolǵan «KamAZ» júrgizýshisi Qýanysh Nurǵazın óz kinásin tolyqtaı moıyndap, polıseılerdiń týystarynan keshirim surap júrgen syńaıly.
Iá, beıbit kúnniń batyrlary aramyzda júr. Biz olardyń batyldyǵyna bas ıip, erlikterin baǵalaı bilýimiz kerek.
Erlik eseppen jasalmaıdy. Qaısar minez qajet kezinde kórinedi.
Farıda BYQAI,
«Egemen Qazaqstan»
