Túıe jetektegen jıhankez

Zymyranyńyz entikpeı ǵaryshqa jetip, nebir reaktıvti ushaqtar qurlyqtardyń arasyn qas pen kózdiń arasynda jalǵap, ushqyr kólikter jelden ozyp ketip jatqan myna zamanda Qazaqstandy túıemen aralap shyǵýǵa bel býǵan adamdy kórdińiz be? Onyń ústine qystyń kózi qyraýda ıen dalada ıtińdep jaıaý júrýdiń ózi azap emes pe? Eń bolmasa, motosıklmen el aralaýǵa shyǵypty dese, aqylǵa qonymdy sekildi kórinedi. Al túıeni jetektep jaıaý jolǵa shyqqan adamnyń jankeshtiligi eriksiz tańǵaldyrdy. Qaıbir kúnderi «kári quda» ábden qaharyna minip, kóktemniń aldynda sońǵy tuıaq serpigendeı aıazyńyz susty kúıge enip aldy. Dál osy kezde Jańaqorǵan aýdanynyń Jaıylma aýylynyń mańynda sýyqtan búrseń qaǵyp, sheńgeldiń arasynda bir túıeli kisi jatyr deıdi. Sóıtse, bul shved jıhankezi Krıstıan Bodegren eken. Jıhankezdiń jos­pary buzylyp, jaǵdaıy bolmaı jatqanyn jańaqorǵandyq Alshynbaı Turtanovqa Alma­tydan tanystary qońyraý shalyp aıtypty. Jolaýshynyń jaǵdaıyn jasaý, Qudaıy qonaqqa qolyndaǵysyn berý ejelden kele jatqan qazaqy ádet emes pe? Alshekeń Krıstıandy taýyp alyp, úıine ákelip, jyly-jumsaǵyn usynyp, qonaqjaılyq tanytypty. Shved jıhankezi Jańaqorǵanda neǵyp júr deımiz ǵoı endi. – EKSPO-2017 kórmesiniń taqy­ryby meni qatty qyzyq­tyrdy. Solaısha, Astana tórinde ótetin halyqaralyq sharaǵa óz úlesimdi qosaıyn, álemdi balamaly energııaǵa kóshýge jáne tabıǵı qýat kózderin tıimdi paıdalanýǵa úndep otyrǵan Qazaqstannyń bastamasyn qoldaıyn degen nıetpen keldim. Jol saparym Almaty oblysynyń Balqash aýdanynan bastaldy. Myna túıeni de sol jaqtan satyp aldym. Baǵytym – Mańǵystaý. Kas­pıı teńiziniń jaǵalaýynda saparymdy túıindesem degen josparym bar. Osy aralyqty júrip ótýge 8 aıǵa jýyq ýaqyt ketedi. О́z josparymda, tamyz aıynda dittegen jerime jetýim kerek. Sosyn túıemdi satyp, Astanaǵa EKSPO-2017 kórmesine baramyn. Sol jerde shetelderden kelgen týrısterge Qazaqstan jaıly ózim túsirgen rolık-shoý­dy kórsetip, tanystyrylymyn jasaımyn,– deıdi Krıstıan. Álemniń bir basynda jatqan Shvesııadan shyqqan jıhankezdiń Qazaqstanda ótetin kórmege qoldaý bildirip, eldi tanyp, tanyp qana qoımaı, ózgelerge de tanystyrý nıetine ishimiz jylyp qaldy. Erikkenniń ermegi deıtindeı emes, Krıstıannyń bul sapary erlikpen para-par der edik. Sebebi, motosıklmen nemese jeńil kólikpen Qazaqstandy jelip ótpeı, jaıaý-jalpylap, túıesin jetektep, árbir tóbesi men tasyn tanýǵa umtylǵany erlik emeı, nemene?! «Qazaqtar óte qonaqjaı halyq eken. Jol-jónekeı jolyqqan kisilerdiń barlyǵy kómektesýge beıim tura­dy. Dastarqany jaıýly, júzderi jadyrańqy. Júregiń jylıdy»,– deıdi ol. Bul Krıstıannyń birinshi saıahaty emes. Buǵan deıin Ońtústik Amerıka elderin aralap, Afrıkadaǵy Sahara shólin kóldeneńnen basyp ótipti. Munyń aldynda Mońǵolııany sharlaǵan. Sodan Qazaqstanǵa jetip, EKSPO-2017 halyq­aralyq kórmesine sózben emes, ispen qoldaý bildireıin dep jolǵa shyqqan. Aıtpaqshy, jıhankez Jańa­qorǵannyń áıgili batpaǵynyń da qasıetin sezindi. Ábden sýyqtap qalǵan jolaýshy ataqty shıpajaıda birneshe kún tynyǵyp, boıyndaǵy sýyǵyn alyp, túıesin de damyldatyp qaıta saıahatyn jalǵastyrdy. Sapary sátti bolsyn deıik. Erjan BAITILES, «Egemen Qazaqstan» Qyzylorda oblysy