SMART-taqııa zaǵıptar úshin jasaldy

SMART-taqııa – aqtaýlyq oqýshy oıynyń jemisi. Aqtaý qalasyndaǵy hımııa-bıologııa baǵytyndaǵy Nazarbaev zııatkerlik mektebiniń 12 synyp oqýshysy Sáttiǵalı Joldasov bir aıǵa jýyq ýaqyt eńbektengen óz týyndysyn kózi kórmeıtin jáne nashar kóretin jandarǵa arnady. – Taqııada qarapaıym uıaly telefonnan alynǵan qozǵalys eseptegishi bar. Ol dirildetkish motorǵa sıgnal beredi. Adam júrgen kezde taqııadaǵy sensorlar aldaǵy kedergilerdi qarap otyrady da, qandaı da bir kedergini baıqaǵanda SMART-taqııa dirildeı bastaıdy. Sodan keıin taqııaly adam tıisti jaǵyna burylyp, qozǵalys baǵytyn ózgerte alady. Joba «Ardýıno» mıkroplatasynda jasaldy, – deıdi Sáttiǵalı óz izdenisi týraly. Joqtan bar jasap, kózi kórmeıtin jáne nashar kóretin jandarǵa járdem qolyn sozǵysy kelgen oqýshy óz týyndysynyń zaǵıp jandarǵa kómegi bolsa dep úmittenedi. Gúlaıym ShYNTEMIRQYZY, «Egemen Qazaqstan» Mańǵystaý oblysy