Senat tóraǵasy: «О́ndiristik jáne joǵarǵy tehnologııalyq bıznesti damytý qajet»

Qazaqstannyń JIО́-degi ınnovasııalyq ónimniń úlesi shamamen 1% ǵana. QR Parlamenti Senatynda otandyq káspkerlikti damytýǵa arnalǵan tyńdalymda QR Senat tóraǵasy Qasym-Jomart Toqaev bızneske ınnovasııalyq kózqarastyń jetispeýshiligin atap ótip, osy máseleni jekeleı qaraýdy usyndy, dep jazady palata.kz. Qasym-Jomart Toqaev «Atameken» Ulttyq kásipkerler palatasy, «Damý» kásipkerlikti damytý qory otandyq bızneske aıtarlyqtaı qoldaý kórsetetinin atap ótti. Sonymen qatar, Elbasy tapsyrmasymen bıznesti damytýǵa arnalǵan «Bıznestiń jol kartasy», «Agrobıznes–2020», ındýstrııalyq jáne ınnovasııalyq damý memlekettik baǵdarlamasy syndy jekelegen baǵdarlamalar ázirlenip, tıimdi júzege asyp jatqanyn, bıyldan bastap kásipkerlikti damytýǵa negizdelgen 2017-2020 jyldarǵa arnalǵan «Nátıjeli jumyspen qamtý jáne jappaı kásipkerlikti damytý» baǵdarlamasy qolǵa alynǵanyn da aıtyp ótti. «Memleket otandyq bıznes ahýaldy jaqsartý baǵytynda júıeli kúsh jumsaýda. Alaıda sala damýyna jaǵdaı jasaý azdyq etedi. Elimizdiń ekonomıkasynda áli de munaı jáne taý-ken metallýrgııasy sektoryna basymdyq berilip otyr. Al shaǵyn jáne orta bıznestiń JIО́-ǵa qosar úlesi 25%-dan aspaı tur. Shaǵyn bıznes saýda men aýyl sharýashylyǵynan ary aspaıdy. Al damyǵan elderde shaǵyn jáne orta bıznes úlesi JIО́-niń 50% quraıdy. Qazaqstandyq bıznes jalpy ınnovasııalardy qoldaný boıynsha tómen kórsetkishterge ıe. 2015 jyldyń qortyndysy boıynsha Qazaqstannyń JIО́-degi ınnovasııalyq ónimniń úlesi 1% ǵana quraǵan. Elbasy tapsyrmasyna qaıshy osy jaǵdaıdyń sebebin egjeı-tegjeıli anyqtaýymyz qajet», – dedi Senat tóraǵasy. Qasym-Jomart Toqaev kóp elderde basymdyq memlekettik qoldaýǵa emes, kásiporynnyń derbestigine beriledi. Kásipkerlikke baǵyttalǵan memlkettik qoldaý ekonomıkalyq aqparatqa sáıkes tehnologııalarmen qamtamasyz etýde, kásipkerliktiń ınnovasııalyq túrlerin yntalandyrýda kórinis tabady. Sondaı-aq, damyǵan memleketterde tehnıkalyq ınnovasııalardyń qarqyndy damýy bıznes-sektordyń basty ilgerileý faktoryna aınalyp otyrǵanyn úlgi retinde aıtty. «Sheteldik kásipkerler naryqtaǵy básekelestiktiń órshýine mán berip, jańa tehnologııalar men ınnovasııalardy engizýge kúsh salýda. Biz elimizdegi óndiristik jáne joǵarǵy tehnologııalyq bıznestiń damýyna nazar aýdarýymyz qajet. Memlekettik qoldaý da tek qana osyndaı bıznes túrine ǵana baǵyttalýy abzal, onyń ishinde kvazımemlekettik kásiporyndary tapsyryspen qamtamasyz etý de bar», – dep atap ótti Qasym-Jomart Toqaev. Senat tóraǵasy ózin-ózi jumyspen qamtyp otyrǵan azamattarǵa, jeke kásibin ashýǵa nıettengen jandarǵa barynsha qoldaý kórsetip, jastarǵa kásipkerlik negizderin oqytýdy, olardyń jeke bızneste jumys isteýine jaǵdaı jasaý kerektigine basa nazar aýdardy. Sonymen qatar Qasym-Jomart Toqaev sheteldik ınvestorlarǵa, sondaı-aq otandyq kásipkerlerge «bir tereze» qaǵıdasymen qyzmet kórsetý máselesi ózekti, bul baǵytta kemshilikter bar ekenin jetkizdi. Áli de «bir terezeniń» janynan qosymsha «terezeler» ashylyp, mınıstrlikter arasyndaǵy áýre-sarsańnyń sheshilmegenin atap ótti. Damyǵan memleketterde elektrondy qyzmet salasy jaqsy qoldanys pen suranysta. Osy turǵyda otandyq elektrondy úkimet tetigi sózimizge dálel. Úkimet tarapynan bıznes úshin «Bir tereze» iske asatyn bolsa, qujat almasý úderisi, rásimdeý jumystary jeńildeıdi. Jıyn barysynda QR Parlamenti Senatynyń depýtaty Ahan Bıjanov Kásipkerler palatasynyń otandyq ǵylymdy damytýǵa qandaı úles qosqanyn, osy jolda atqaryp jatqan eńbekter týraly aıtýdy surady. Tıisinshe, «Atameken» UKP Basqarma tóraǵasy Abylaı Myrzahmetov ınnovasııalar arzan jáne uzaqmerzimdi aqshany qajet etetinin alǵa tartyp, Elbasy qoıǵan mindetter boıynsha jumys istelip jatqanyn, ınnovasııalardy qolǵa alý úshin salyqtyq jeńildikterdi qamtamasyz etý kerektigine nazar aýdardy. «Atameken» ǵylym salasynyń mamandarymen birge mınıstrlik aldynda saýal qoıyp, joǵary oqý oryndaryna júkteletin ınnovasııalar men ǵylymı jumystar eń aldymen bıznespen kelisilgeni jón ekenine nazar aýdaryp otyr. Abylaı Myrzahmetovtyń aıtýynsha, qazirgi tańda «Atamekende» ondaı múmkindik joq. Sondyqtan, ǵylymı keńesterde, otyrystarda, salalyq bıznes qurylymdarda Kásipkerler palatasynyń usynystary eskerilse degen ótinishin de jasyrmady. Parlamenttik tyńdalymda Senat tóraǵasy bıznesti damytý úshin memlekettiń de, kásipkerlerdiń da múddesin baılanystyratyn tıimdi ári qolaıly ortany qalyptastyrý basty maqsat ekenin jetkizdi.