Úkimette EKSPO nysandaryn kommersııalaý máselesi sóz boldy

Úkimet úıinde QR Premer-Mınıstri Baqytjan Saǵyntaev Astanada ótetin EKSPO-2017 halyqaralyq mamandandyrylǵan kórmesinde Qazaqstannyń ulttyq pavılonyna qoıylatyn otandyq ǵalymdar men uıymdardyń ǵylymı-tehnıkalyq jobalaryn qarastyrý boıynsha jumys keńesin ótkizdi. QR Energetıka mınıstrligi janyndaǵy ǵylymı-tehnıkalyq keńes 139 ınnovasııalyq jobanyń 27-sin iriktep aldy. Ázirlemelerdiń taqyryby energııanyń jańa jańǵyrtpaly kózderin damytý, energııa únemdeý jáne energııa tıimdiligi, qorshaǵan ortaǵa jaǵymsyz yqpaldy tómendetý tehnologııalarymen baılanysty. Sonymen qatar, derbes kún qondyrǵysyn, kishi derıvasııalyq SES, qýattylyǵy 200 kVT-qa deıingi gıbrıdti jel elektr stansııasy, kómiri bar qaldyqtardy plazma hımııalyq qaıta óńdeý tehnologııalaryn qurý jobalary da qarastyryldy. Aıta ketý kerek, atalǵan jobalardyń keıbireýi búgingi tańda ishki naryqta suranysqa ıe jáne energetıka, turǵyn úı-kommýnaldyq sharýashylyǵy salalarynda sátti qoldanysta. Baqytjan Saǵyntaev ázirlemelerdiń avtorlarymen jobalarǵa qoldaý kórsetý jáne kommersııalandyrý, jańa ındýstrııalardy qurý jáne ınnovasııalar salasyn damytý máselelerin talqylady. Eske sala keteıik, Memleket basshysy óziniń «Qazaqstannyń úshinshi jańǵyrýy: jahandyq básekege qabilettilik» atty Joldaýynda ınnovasııalarǵa qoldaý kórsetý, olardy óndiriske jyldam engizý, JOO-lar, Nazarbaev Ýnıversıteti jáne «Alataý» ITP bazasynda ǵylymı jáne ınnovasııalyq áleýetti arttyrý máselelerine basa nazar aýdarǵan.