Shyǵys Qazaqstanda apatqa ushyraǵan tikushaq ushqyshynyń máıiti tabyldy

Shyǵys Qazaqstanda apatqa ushyraǵan tikushaq ushqyshynyń denesi tabyldy, dep habarlaıdy QazAqparat. Tergeý-jedel toby men qutqarýshylar qulaǵan tikushaqtyń 47 jastaǵy ushqyshy - Petr Ýstınovtiń denesin tapty. Ol MI-8 tikushaǵymen Aıagózge jetkiziledi. «Apat bolǵan jerde IID tergeý-shuǵyl toby jumystaryn jalǵastyrady. Olarmen Shyǵys óńirlik aeroutqyr jedel qutqarý jasaǵy birge qalady», – dep habarlady ShQO TJD baspasóz qyzmetinde. Buǵan deıin QR Investısııalar jáne damý mınıstrligi qulaǵan tikushaqtyń ıesi anyqtalǵandyǵyn málim etken bolatyn. Aıta keteıik, keshe Shyǵys Qazaqstan oblysynda jekemenshik «Strekoza 7-Gazelle SA341» tikushaǵy apatqa ushyraǵan. Ony izdeýge búgin tańerteń oblys ortalyǵynan bortynda qutqarýshylar toby jáne ShQO TJD basshysynyń orynbasary bar MI-8, Semeı qalasynan MI-17 áskerı tikushaǵy jumyldyryldy. ShQO TJD daǵdarys ortalyǵynda jáne Aıagóz aýdanynda jedel shtab quryldy. «S-341»-di Almaty oblysynan izdeýge attandyrylǵan jeke kompanııanyń MI-2 tikushaǵy tapty. «Qazaeronavıgasııanyń» málimetinshe, joǵalǵan tikushaq Aıagóz qalasynan soltústik batysqa qaraı 60 km jerden tabyldy. Olardyń habarlaýynsha, ushqysh qaza tapqan. Aman qalǵan bir jolaýshy Aıǵyz aýylyna jetkizildi.