Ýaqyt aǵymyna saı qujat
Men – Qazaqstannyń memlekettik baǵdarlamasy aıasynda osy elde oqyǵan alǵashqy aýǵan stýdentimin. Sondyqtan, únemi Qazaqstandaǵy ózgeristerge, onyń damý baǵytyna nazar aýdaryp júremin.
Jaqynda Qazaqstan Prezıdenti «Qazaqstannyń Úshinshi jańǵyrýy: jahandyq básekege qabilettilik» atty el halqyna Joldaýyn jarııalady. Meniń oıymsha, bul qujat Qazaqstannyń ekonomıkalyq áleýetin arttyrýǵa tikeleı yqpal etedi, sondaı-aq halyqtyń turmysyn odan ári kóterýge jol ashady.
Prezıdent Nursultan Nazarbaev óz elin damýdyń dańǵyl jolymen bastap keledi. Oǵan Qazaqstannyń 25 jyl kóleminde qol jetkizgen tabystaryn naqty dálel retinde usynýǵa ábden bolady.
Árbir memlekettiń basshysy óz halqynyń tarıhyn, salt-dástúrin, mádenıetin jáne basqa da qundylyqtaryn eskere kelip, eldiń damý baǵytyn aıqyndaýy tıis ekenin atap ótkim keledi. Osy oraıda, Prezıdent Nursultan Nazarbaev óz halqynyń kóńilinen shyǵatyn jumystardy júıeli túrde atqarýda.
Jalpy, Qazaqstan óz Táýelsizdiginiń 25 jylynda halyqaralyq jáne aımaqtyq kúrdeli máselelerdi sheshýde talaıǵa úlgi bolýda. Mundaı is tatýlyǵy jarasqan, turaqtylyq pen ornyqty damýǵa qol jetkizgen, maqsaty aıqyn qýatty memlekettiń ǵana qolynan keledi.
Besmella TABAN,
Aýǵanstan Qarjy mınıstrligi arnaıy operasııalar departamentiniń jetekshisi
Jahandyq jarystyń uly dúbiri
Qazaqstan Respýblıkasynyń Prezıdenti Nursultan Ábishuly Nazarbaevtyń 2017 jyly 31 qańtarda Qazaqstan halqyna arnaǵan Joldaýy búgingi kúnderi álem elderiniń nazarynda. Bul Joldaýdyń «Qazaqstannyń Úshinshi jańǵyrýy: jahandyq básekege qabilettilik» dep atalýynyń ózindik máni bar dep oılaımyn. О́ıtkeni, osy Joldaý «Qazaqstan-2030», «Qazaqstan-2050» strategııalarynyń, «Nurly jol», «100 naqty qadam» Ult jospary sııaqty túbegeıli maqsattardyń tikeleı jalǵasy bolyp otyr. Qazaqstannyń kóp ultty halqy táýelsizdikke qol jetkizgen 25 jyldyń ishinde batyl bastamashyl, kóregen de boljamshyl, alǵyr da tabandy N.Á.Nazarbaevtaı Elbasynyń basshylyǵymen adam aıtqysyz úlken belesterdi baǵyndyrdy. Bul sózimizdiń bultartpas dáleli Qazaqstannyń saıası, ekonomıkalyq, áleýmettik salalarda qol jetkizgen zor tabystary, jasampaz jetistikteri bolyp tabylady. Atap aıtsaq, qarqyndy ósip kele jatqan ekonomıkalyq kórsetkishter, aýyr óndiristerdiń iri ortalyqtary, jańadan ashylǵan jumys oryndary, sońǵy jyldary júzege asqan ınfraqurylymdar, Saryarqadaı saıyn dala tósinde boı kótergen elorda – ásem Astana, taǵysyn taǵylar. Sondaı-aq, Qazaqstan Respýblıkasy BUU Qaýipsizdik Keńesiniń turaqty emes múshesi boldy, Sırııada shıelenisken saıası daǵdarysty retteýde álemdik yqpaldy elder arasyna dánekerlik kórsete bildi, órkenıetti eldermen terezesi teń túrde júrgizip otyrǵan salıqaly saıasatynyń arqasynda Qazaqstannyń halyqaralyq arenadaǵy bedeli kúrt kóterile tústi. Qazaqstannyń Úshinshi jańǵyrýy Joldaýy ǵylymı jáne ınnovasııalyq tehnologııanyń zamanaýı jetistikterine súıene otyryp, álemdik Tórtinshi ónerkásip revolıýsııasyn utymdy qabyldaý, jahandyq uly ózgerister men básekege qabilettilikti arttyrý, jańa jaǵdaıǵa ýaqyt uttyrmaı tez beıimdelý, osy arqyly ekonomıkalyq ósimdi qamtamasyz etip, makroekonomıkalyq turaqtylyqty saqtaý, adamı kapıtaldyń qadir-qasıetin kóterip, halyqtyń áleýmettik tirshiligin jaqsartý, jańa Eýrazııalyq logıstıkalyq ınfraqurylymdy damytý, bıznes-ortanyń múmkinshiligin tolyq paıdalanýdy arttyrý, el órkenine tusaý bolǵan sybaılas jemqorlyqqa qarsy kúresti kúsheıtý sııaqty san-salaly asa mańyzdy maqsattardy qamtyǵan strategııalyq keshendi baǵdarlama dep baǵalaýǵa ábden laıyq. Osynaý Úshinshi jańǵyrý tabysty oryndalsa, Qazaqstannyń álemniń ozyq 30 eliniń qatarynan oryn alý maqsatyna mejeli ýaqytynan buryn qol jetkizetinine de esh shúbá keltirmeýge bolady. Qysqasy, Qazaqstannyń Úshinshi jańǵyrýy – jańa zaman jańǵyryǵy, jahandyq báseke dáýiriniń uly dúbiri!
Sultan TÁÝKEIULY, Mońǵolııanyń eńbek sińirgen mádenıet qaıratkeri, jazýshy, ǵylym doktory, professor
