Túrme reformasyndaǵy oń úderis

Ortalyq Azııadaǵy aımaqtyq «Renal Reform International» ókildigi (Halyqaralyq túrme reformasy) Astanada jýrnalısterge arnalǵan baspasóz konferensııasyn ótkizdi. «Qazaqstandaǵy túrme reformasy: úmit pen shyndyq» taqyrybynda uıymdastyrylǵan shara aıasynda ótken jylǵy túrme reformasynyń jahandyq úrdisteri men elimizdegi túzeý mekemeleriniń ustaý jaǵdaılary, sottalǵandardyń dinı radıkaldaný máseleleri men olardy qoǵamǵa qaıta beıimdeýge qatysty túıinderdiń jaı-kúıi tarqatyldy. Aımaqtyq «Renal Reform International» dırektory Azamat Shámbilov jetekshilik etken jıynǵa memlekettik mekemelerdiń, ÚEU, halyqaralyq uıymdar men dıplomatııalyq mıssııalardyń ókilderi qatysyp, ashyq únqatysý alańynda pikir almasty. Aldymen sóz alǵan aımaqtyq «RRI» dırektory A.Shámbilov Qazaqstannyń túrme reıtıngine qatysty kórsetkishteri týraly birqatar derekterdi kóldeneń tartty. Onyń aıtýynsha, sońǵy jyldary elimizdiń ekonomıkalyq básekege qabilettiligi men ishki saıası jaǵdaıdyń turaqtylyǵy jáne azamattyq qoǵamnyń belsendi damýynyń nátıjesinde, bul saladaǵy jasalyp jatqan jumystar álem elderi aldynda óte joǵary baǵaǵa ıe bolǵan kórinedi. «Bul rette aldymen memlekettiń qylmystyq zań­namadaǵy gýmanıstik saıasatty júıeli júr­gizýi men osy baǵyttaǵy baǵdarlamalyq jos­par­lardyń sátti oryndalýyn erekshe atap ótken jón. Ásirese, Qazaqstanda azamattardy qu­qyqtyq jaýapkershilikke tartý nemese bas bos­tandyǵynan aıyrýda izgilendirilgen jaza túri men balamaly ádisterdiń keńinen qoldanylýy kóptegen el úshin úlgi alarlyqtaı deńgeıge jetýi zor jetistik retinde qabyldanýda», – dedi A.Shámbilov. Sonymen qatar, jıyn barysynda 2015-2016 jyldardaǵy azaptaýlar men olar boıynsha qozǵalǵan ister sanynyń statıstıkalyq derekteri, Qazaqstandaǵy túrme statıstıkasy men onyń taldaý materıaldary ınfografıka retinde usynylyp, jurtshylyq nazaryna «Bostandyq joq mekender» taqyrybynda arnaıy fotokórme uıymdastyryldy. Nurlybek DOSYBAI, «Egemen Qazaqstan»