Kereký kúres zalyna zárý

Kereký topyraǵy bilekti balýanǵa kende bolǵan emes. Qazir de naızaǵaı namysty jigitter barshylyq. Biraq, qazaq kúresin serik etip júrgen sol saıypqyrandarǵa jasalyp otyrǵan jaǵdaıǵa kóńil tolmaıdy. Kóz kórip júrgen kemshilikter de joq emes. Iá, qazaq kúresiniń bir kez­deri bul óńirde turalap qalǵany ras. Tól kúresimiz ǵana emes, ózge de sport túrleriniń bo­saǵadan syǵalap qalǵanyn jaq­sy bilemiz. Shúkir, qazir jaǵ­daı edáýir jaqsardy. Qazaq kúre­sine degen qyzyǵýshylyq ta, qamqorlyq ta alabóten. Alaıda, áli kúnge deıin sheshimin tappaǵan máseleler de barshylyq. Sonyń biri – Pavlodarda qazaq kúresine arnalǵan arnaıy zaldyń joq­tyǵy. Jergilikti bapkerler men balýandar tól sportymyzǵa arnalǵan arnaıy sport kesheniniń boı kótergenin qalaıdy. Negizi, bul áńgime kópten aıtylyp júr. Jýyrda oblystyq qazaq kúresi federasııasynyń alqa májilisinde de sóz boldy. Sol jıynǵa qatysqan sambonyń sańlaǵy, búginde M.Qaıyrbaev atyndaǵy ulttyq jáne halyqtyq sport túrleri klýbynyń tizginin ustaǵan Erjan Imanjúsipov kópshiliktiń nazaryn bul máse­lege taǵy bir márte aýdardy. – «Qazaqstan barysy» týrnıri ótetin ýaqyt ta jaqyndap keledi. Al bizdiń balýandardyń bas qosyp, bilek kúshin synar jeri joq. Árıne, kishigirim sport zaldary bar. Oqý oryndarynyń, sport keshenderiniń zaldaryn surap alyp, jattyǵýǵa bolady. Biraq, mundaı zaldarǵa oblystyń myqty degen barlyq balýany men bapkerlerin bir sátte jınaı almaımyz. Sportshylarymyz oqý-jattyǵý jıyndaryn bó­lek-bólek ótkizedi. Budan shyq­qan nátıje de mardymsyz. Son­dyqtan, Pavlodarǵa qazaq kú­resine arnalǵan jeke sport ke­sheni kerek. Bálkim, oblys or­talyǵynan osyǵan laıyqty ǵımarat ta tabylyp qalar, – dedi E.Imanjúsipov. Osy jaǵdaıǵa baılanys­ty sport ardageri Amangeldi Aımaǵambetov te óz oıyn bil­dirdi. – Pavlodarda boks orta­lyǵy bar. Bul – oblystaǵy byl­­ǵary qolǵap sheberleriniń jeke otaý­y. Olar qalaǵan ýa­qyt­­ta osy ortalyqqa jınalyp, oqý-jattyǵý jıyndaryn ót­kize alady. Dál osyndaı keshen ba­lýandarǵa da kerek. Ár ǵı­ma­rattyń jertólesinde jat­ty­ǵyp, jarys ótkizý úshin iri sport nysandarynyń, oqý oryn­darynyń tabaldyryǵyn tozdyrý – kesheginiń áńgimesi bolýy kerek edi. «Qazaqstan barysyn», «Álem barysyn» tárbıelep shyǵaramyz desek, aldymen osy máseleniń túıinin tarqatyp alǵan jón, – deıdi A.Aımaǵambetov. Kereký óńirinde qazaq kúresine kelgende kejegesi keıin tarta qalatyn aýdan ákimderi de bar. Basshylardyń nemkettiliginen Maı jáne Ertis aýdandarynyń balýandary oblys ortalyǵynda ótetin jarystarǵa kóbine qa­tyspaıdy. Qarjynyń joqtyǵy qolbaılaý. Al endi bir óńirlerde qazaq kúresine arnalǵan sporttyq kıim jetispeıdi. Bul máseleler de federasııanyń alqa májilisinde qaýzaldy. Búginde oblysta 5 myńnan astam adam qazaq kúresimen shuǵyldanady eken. Pavlodar oblysynyń aýmaǵynda ótetin tórt týrnır respýblıkalyq jarystardyń kúntizbesine engizilgen. Byltyr bes jerlesimiz «Sport sheberi» normatıvin oryndady, 60-tan astam sportshy «Sport sheberligine úmitker» atandy. Oblys boıynsha 168 jattyqtyrýshy balýandardy qazaq kúresine baýlýda. Sondaı-aq, byltyr qazaq kúresi federasııasy oblys quramasy úshin 12 dana sporttyq kıim satyp alypty. Bul baǵyttaǵy jumystar bıyl da jalǵasyn tabady. Alqa májilisinde Pavlodar qalasynyń ákimi, oblystyq qazaq kúresi federasııasynyń prezıdenti Nurjan Áshimbetov kúres zaly máselesin nazarda ustaıtynyn málimdedi. Ákim qaladan bos ǵımarat tabylsa, kúres zalyna laıyqtap jóndeý sóz emes degendi alǵa tartty. Sondaı-aq, demeýshilerdi tarta otyryp, sport keshenin salýǵa da bolatynyn aıtyp qaldy. Árıne, bári ýaqyttyń enshisinde. Tek, sóz kúıinde qalmasa deısiń... Farhat ÁMIRENOV, jýrnalıst PAVLODAR