Erkebulan – «Zenıttiń» nazarynda

Reseıde «Sport-Ekspress» degen tanymal sport basylymy bar. Sol aqparat quraly jaqynda jas fýtbolshy Erkebulan Seıdahmetti «Qazaqtyń Messıi» dep jazypty. Erkebulandy aqpan aıynyń basynda Reseıdiń «Zenıt» fýtbol klýbynyń jasóspirimder quramasyna shaqyrǵan edi. Fýtbolshy pıterlik komandamen birge Kıprdegi oqý-jattyǵý jıyndaryna qatysyp jatyr. «Zenıt» komandasy selek­sıo­nerleriniń jas qazaq fýtbolshy­syna kózi túsetindeı jóni bar. О́tken jyly Moldovanyń Tıraspol qalasynda ótken «Sherıf kýbogynda» Qazaqstan jasóspirimder quramasy (U-17) «Zenıtpen» 3:3 esebimen teń oınaǵan edi. Sol kezde Seıdahmet eki gol soǵyp, dýbl jasady. Odan keıin Granatkın memorıaly týrnırinde úzdik shabýylshy atandy. Osydan keıin Erkebulannyń talantyna pıterlik komanda nazar aýdar­a bastaǵan. Ony 19 jasqa deıingi Qazaqstan jasóspirimder quramasynyń bas bapkeri Aleksandr Kýznesov ta aıtqan edi. – Oqý-jattyǵý jıyndary keremet ótip jatyr. Bul jerde barlyǵy kóńilimnen shyǵady. Bapkerler shtaby men fýbolshylar tarapynan qoldaý bar. Jattyǵý barysynda, ásirese doppen jumys isteýge qatty mán beremiz. Deńgeı jaǵynan Qazaqstan fýtbolynan aıyrmashylyq aıtarlyqtaı baıqalady. Bapkerler meni tek shabýyl­shy retinde oınatyp júr. «Zenıtte» qalam ba, joq pa, ázirge belgisiz. Áli naqty sheshim qabyldaǵan joqpyn, – deıdi Seıdahmettiń ózi. FIFA-nyń talaby boıynsha 18 jasqa tolmaǵan fýtbolshymen halyqaralyq transferge tyıym salynǵan. Erkebulan 4 aqpan kúni 17 jasqa toldy. Al 18 jasqa tolý úshin áli bir jyl kerek. FIFA kámelettik jasqa tolmaǵan fýtbol­shynyń ózge eldiń klýbymen kelisimshart jasaýyna úsh jaǵdaıda ǵana ruqsat etedi. Birinshisi – ata-anasy jumys barysy boıynsha nemese basqa da sebeppen sol elge qonys aýdarsa. Biraq fýtbolǵa qatysty bolmaý kerek. Ekinshisi – Eýropa odaǵyna múshe elderdiń bir ekonomıkalyq aıma­ǵyna kirgen jaǵdaıda. Sondaı-aq, úshin­shiden, ata-anasy turatyn meken klýb ornalasqan qaladan 100 shaqyrym qa­shyqtyqtan alys bolmaǵanda ǵana ruqsat beriledi. «Sport-Eksprestiń» málimeti boıynsha, pıterlik komandanyń Erkebulannyń oıynyna kóńili tolady eken. Jaqynda «Zenıt» jastary Kıprde «Lokomotıv» (Máskeý) klýbynyń jasóspirimder quramasymen kezdesip, jeńiske jetti. Osy oıyndaǵy jalǵyz goldyń soǵylýyna Seıdahmettiń qosqan úlesi zor. Sebebi «Lo­komotıv» qorǵaýshylary óz aıyp alańynda qazaqstandyq shabýylshyǵa qarsy tártip buzyp, tóreshi penaltı belgiledi. Ony K.Kaplenko múltiksiz oryndady. Sóıtip, Igor Sımýtenkov jat­tyqtyratyn «Zenıt» jet­kinshikteri jeńiske jetti. «Zenıttiń» jas fýtbolshyǵa kóńili tolady. Biraq halyqaralyq talapqa sáıkes, kelisimshartqa otyra almaıdy. Sondyqtan endi ol úıine qaıtatyn shyǵar. Oqıǵa osylaı órbigen jaǵdaıda jas fýtbolshy «Taraz» sapynda premer-lıgada óner kórsetýi tıis. Al «Zenıt» ony jiti baqylap otyrady. Kelisimshart máselesi bir jyldan keıin qaıta qozǵalýy múmkin. Sondaı-aq, Seıdahmettiń 21 jasqa deıin Qazaqstan quramasyna shaqyrtý alýy da ǵajap emes», dep jazady reseılik basylym. Erkebulan Seıdahmet 2000 jyly Taraz qalasynda dúnıege kelgen. Segiz jasynan «Montajnık» dep atalatyn áýesqoı komandada fýtboldyń qyr-syryna qanyǵa bastaǵan. Joǵaryda aıtqanymyzdaı, «Sport-Ekspress» syndy bedeldi basylym jas fýtbolshyǵa «Qazaq­tyń Messıi» degen baǵa berdi. Messıge uqsatqannan góri qa­zaqtyń Erkebulany degen ál­deqaıda jarasymdy emes pe?! Endeshe, oǵan bolashaqta aıaqdoptyń qyr-syryn meńgergen sheber fýtbolshy bolýǵa biz de tilek qosamyz. Bek TО́LEÝOV, jýrnalıst ASTANA