Bıyl Jambyl oblysynda 325 myń sharshy metr baspana salynady

О́tken jyly Jambyl oblysynda turǵyn úı qurylysy joǵary qarqynmen júrdi. Bul týraly halyqqa esep berý kezdesýinde oblys ákimi Kárim Kókirekbaev málimdedi, dep habarlady QazAqparat. «Sońǵy jyldar ishinde alǵash ret qurylys jumystarynyń kólemi 103,3 mlrd. teńgeni qurap, 4,2 % ulǵaıdy», – dep atap ótti óńir basshysy. «Qurylys salasyna salynǵan ınvestısııalar 32% artyp, 22,6 mlrd teńgege jetti. «О́ńirlerdi damytý – 2020» baǵdarlamasy boıynsha 2016 jyly 318 myń sharshy metrden astam baspana turǵyzyldy, bul 2015 jylmen salystyrǵanda 8,8% kóbirek. Bıýdjettik qarajat esebinen 36,6 myń sharshy metr baspana salyndy, al jeke kompanııalar 281,6 myń sharshy metr baspana qurylysyn qarjylandyrdy», – dep atap ótti Kókirekbaev. «2016 jyly kezekte turǵandarǵa 10,2 myń sharshy metrdi quraıtyn eki úı jáne «Turǵyn úı qurylys jınaq banki» jelisi boıynsha 7,9 myń sharshy metr nesıelik úı paıdalanýǵa berildi. 415 otbasy qonys toıyn toılady. Bıyl 325 myń sharshy metr baspana salýdy josparlap otyrmyz», – dedi oblys ákimi.