Jambyl oblysynda ıesiz sý qoımalary belgili boldy

О́ńirde sý sharýashylyqtaryn tolyq jóndeýden ótkizý jáne tolyqqandy qarjylandyrý úshin kommýnaldyq menshikten respýblıkalyq menshikke ótkizý jalǵasyp keledi. Bul týraly jáne Jambyl oblysynyń aýmaǵyndaǵy sý sharýashylyq nysandarynyń jaǵdaıy kezekti oblystyq ákimdiktegi jınalysta aıtyldy, dep habarlaıdy QazAqparat. «Sý qoımalary qazirgi kóktemde qaýip tóndirmeıdi, olardyń tolý deńgeıi 50-70% shamasynda. Jyl saıyn jóndeý jumystaryn júrgizýdi qarjylandyrý artyp keledi. 2016 jyly oblystyq bıýdjetten kommýnaldyq menshiktegi 18 gıdronysandy jóndeýge 206,2 mln teńge bólindi. Bıyl osy maqsatqa 402 mln teńge bólý josparlanyp otyr. «Gıdronysandardy tıimdi paıdalaný jáne tolyqtaı jóndeý úshin kommýnaldyq menshikten respýblıkalyq menshikke 172 arna berildi. Bıyl osy úderis jalǵasady. Ekinshi kezeńde respýblıkalyq menshikke 280 nysandy ótkizý kózdelip otyr. Qazir oblystyń kommýnaldyq menshiginde 124 ishki sharýashylyq arnasy bar, 90 arna ıesiz qalyp otyr. Ár arnadaǵy jerdegi jumystar jobasyn, memlekettik aktilerdi jáne tehnıkalyq tólqujatyn ázirpleýge oblys bıýdjetinen 225 mln teńge bólinedi», – dedi Jambyl oblysynyń tabıǵı resýrstar men tabıǵatty paıdalanýdy retteý basqarmasynyń basshysy Serik Qoıbaqov. Basqarma basshysy Jambyl oblysynda 117 sý qoımasy bar ekendigin málim etti. Onyń beseýi respýblıkalyq menshikte, beseýi jeke tulǵanyń ıeliginde, 105-i kommýnaldyq menshikte. Oblysta barlyq sý qoımalaryn esepke alýdy júrgizý boıynsha komıssııa qurylǵan.