"Elektrondy kúndelik" júıesine qatysty qoǵam kózqarasy ártúrli - Saǵyntaev

Búgin Úkimet otyrysynda Premer-mınıstr Baqytjan Saǵyntaev "Elektrondy kúndelik" júıesiniń qoǵamda qatty talqylanyp jatqanyn atap ótti. Sonymen qatar ol bul jobany júzege asyrý úshin qoǵam pikirimen sanaý kerektigin aıtty. "Elektrondy kúndelik" júıesine qatysty qoǵam kózqarasy ártúrli. Nege olaı? Eger ol barlyǵyna paıdaly bolsa, qoǵam nege qatty talqylap jatyr!? Adamdardyń qarsy bolatyn tustary bar shyǵar, múmkin. Biz buny bilmeımiz, degenmen ata-analarda, muǵalimderde birqatar kelispeýshilikter týyndap jatqanǵa uqsaıdy. Sondyqtan osynda aıtylǵan máselelerdiń barlyǵy qoǵam talqysyna salynǵany jón. Biz bul jobaǵa qarsy emespiz, eger ıgilikke jarap jatsa, "Sıfrlik Qazaqstan" aıasynda jetildirýge daıynbyz", - dedi Premer-mınıstr. О́z kezeginde BǴM mınıstri Erlan Saǵadıev qazirgi tańda "Kúndelik" júıesin paıdalanatyn muǵalimder sany 174 myńnan asqanyn atap ótti. Onyń aıtýynsha, júıeni 1,4 mln. oqýshy, 854 myńnan astam ata-ana qoldanyp otyr.