Qazir 7 myń mektepte ınternet ornatylǵan - Saǵadıev

Qazirgi kezde 7 000 mektepte ınternet ornatylǵan. Sonyń ishinde jyldamdyǵy 4 Mb/s asatyn ınternet tek 2000 mektepte ǵana bar. Bul týraly búgin Úkimet otyrysynda QR Bilim jáne ǵylym mınıstri Erlan Saǵadıev aıtty. «Elimizdiń mektepterindegi ınternetti ortalyqtandyrý kerek. Sondaı-aq barlyq synypqa Wi-Fi qondyrý qajet. Bul óte mańyzdy. Mundaı apparat ornatý asa qymbat emes», - dedi mınıstr. Sonymen qatar ol balalarǵa arnalǵan jańa deńgeıli sıfrlyq bilim resýrstaryn damytý kerektigin atap ótti. «SBR – beıne jáne ınternaktıvti sabaqtar. Elimizdegi myńnan astam mektep, olardyń ishinde Nazarbaev zııatkerlik mektepteri «BilimMediaGroup» kompanııasy usynǵan resýrstardy 2014 jyldan bastap qoldanyp keledi. Bıylǵy jyly 11 myńnan astam «úshtik» - kompıýter, prosessor jáne ekrannan turatyn jınaqtar alynbaq. Eń aldymen aýyl mektepteri jáne ınternetke qosylý múmkindikteri joq bilim oshaqtary jabdyqtalady», - dedi Saǵadıev. Mınıstr búgingi tańda 73 aqparattyq júıe baryn baıandady. Olardyń bári málimetterdi 4 platformaǵa jiberedi. Birinshisi – UBMB (Ulttyq bilim berý málimetter bazasy) – bul bilim berý júıesi boıynsha barlyq ákimshilik aqparat. Ekinshisi – bul elektrondy kúndelik – aǵymdaǵy úlgerim, mektepter men TjáneKB-niń akademııalyq aqparaty. Úshinshisi – «bultty» býhgalterııa – elimiz boıynsha barlyq bilim berý uıymdarynyń biryńǵaı býhgalterııasy. JBBBJ (Joǵary bilimdi basqarýdyń biryńǵaı júıesi) – JOO-lardyń aqparattyq júıesi. «Atalǵan platformalardy engizý úshin mektepterdegi ınternet jyldamdyǵyn arttyrý jáne olar úshin baılanys tólemin biryńǵaı organda ortalyqtandyrý, sondaı-aq aqparattyq qaýipsizdikti qamtamasyz etýge jaýapkershilikti júkteý qajet», - dep atap ótti E. Saǵadıev. Aıta keteıik, byltyr osyndaı 7 300 komplekt alynsa, 2018 jyly 12 myń jınaq satyp alynady.