«Qazaqqa rahmet aıtý – qasıetti paryzymyz»
Alǵys aıtý kúnine oraı Prezıdent Arhıvinde belgili qoǵam qaıratkerleriniń, etnostyq birlestikter jetekshileri men elimizdegi shet el konsýldyqtary ókilderiniń, arhıv qyzmetkerleriniń, stýdentterdiń qatysýymen «Birlik – bizdiń qasıetti týymyz» atty dóńgelek ústel otyrysy ótti. Prezıdent Arhıviniń dırektory, professor Borıs Japarov saltanatqa qatysqan qonaqtardy Alǵys aıtý kúnimen quttyqtap, qasiretti taǵdyr tolqynymen Qazaqstanǵa qonys aýdarǵan mıllıondaǵan etnos ókilderiniń qazaq jerine kelý tarıhyn qaıyra bir tarqatty. «Patshalyq Reseı men Keńes Odaǵynyń qol astynda bolǵan qazaq dalasy saıası jer aýdarýdyń mekenine aınaldy, halyqtardy jappaı kúshtep kóshirýdiń stalındik zamanynda buryn-sońdy bolmaǵan qasiretti shegine jetti. О́z erikterinen tys jáne onyń ústine qazaq halqynyń pikirin eskermesten, respýblıkaǵa koreıler, Povolje nemisteri, cheshender, ıngýshtar, meshettik túrikter, ózge de ult ókilderi qonys aýdardy. Keńestik besjyldyqtar kezinde qolǵa alynǵan «uly ekpindi qurylystar» men tyń jáne tyńaıǵan jerlerdi ıgerý kezeńinde Qazaqstan orasan zor kóshi-qon tasqynynyń astynda qaldy», dedi arhıv dırektory Borıs Japarov.
Prezıdent Arhıvi qujattarynyń málimetterine súıensek, HH ǵasyrdyń basyndaǵy stolypındik reforma kezinde sharýalardy kóshirý barysynda Qazaqstanǵa Reseı, Ýkraına, Belorýssııadan 1 mln 150 myń adam kelgen. Jıyrma jyldan soń, 30-jyldardaǵy ujymdastyrý kezinde Keńes Odaǵynyń ortalyq óńirlerinen Qazaqstanǵa kýlak retinde jer aýdarylǵan 250 myń sharýa jiberilgen. Budan bólek, osy ýaqytta óndiristik qurylys jumysy úshin 1 mln 200 adam taǵy kelgen.
Dóńgelek ústelde bas qosqan Qazaqstan polıaktar odaǵynyń tóraǵasy, polıak mádenı ortalyǵynyń jetekshisi Oleg Chervınskıı, fashıstik konslagerlerdiń tutqyny bolǵan, fashızm tutqynynda bolǵandardyń qazaqstandyq qaýymdastyǵynyń ókili Vladımır Denısıýk, Ýkraına mádenı ortalyǵynyń tóraıymy Tamara Agapova, «Memlekettik tilge qurmet» qoǵamdyq uıymynyń tóraıymy Asyly Osmanova, Assambleıa múshesi Qazaqpaı Qasımov sóz sóılep, joǵyn aıtyp jasymaǵan, darqan peıilmen barsha ulttyń balasyn bótensimeı, baýyryna basqan qazaq halqyna rahmet aıtty. «Qazaqtaı uly halyqtyń tarıhyna taǵzym etip, taǵdyryna salaýat aıtý, jaqsylyǵyna tilektes bolý – árqaısymyzdyń búgingi azamattyq boryshymyz, qasıetti paryzymyz», dedi Qazaqstan halqy Assambleıasynyń múshesi, akademık Q.Qasımov.
Aıgúl AHANBAIQYZY,
«Egemen Qazaqstan»
ALMATY
