Tarazdyq jastar zııaly qaýym ókilderimen kezdesti

Taraz memlekettik pedagogıkalyq ınstıtýtynyń uıymdastyrýymen «Urpaqtar sabaqtastyǵy» jobasynyń aıasynda Jambyl oblysyndaǵy zııaly qaýym ókilderimen jastardyń erekshe formattaǵy kezdesýi ótti, dep habarlaıdy TarMPI-dyń Aqparattyq-ımıdjdik qyzmetiniń jetekshisi Jandar Asan. Oqý ornynyń «Jeruıyq» etnografııalyq ortalyǵynda ótken basqosýda ınstıtýt rektory Darııa Qojamjarova sharanyń máni men mańyzyna toqtalyp ótti. – Tól tarıhymyzdyń tuńǵıyǵyna úńiler bolsaq, taǵdyr talaıy únemi qyl ústinde bolǵan, «attyń jalynda, túıeniń qomynda kún keshken» qazaq halqy nebir zobalańdy bastan ótkerdi. Azattyqtyń aq tańy atyp, babalar ańsaǵan egemendikti aldyq. Táýelsiz el atandyq. Memleket basshysy Nursultan Nazarbaevtyń salıqaly saıasatynyń arqasynda álemge áıgili boldyq. Jahandaný jaǵdaıynda ómir súrip jatqan óskeleń urpaqty qoǵam talaptaryna saı qalyptastyrý ońaı sharýa emes ekendigi belgili jaıt. Bul turǵyda halqymyzdyń ǵasyrlar boıy jınaqtap, babadan balaǵa mura bolyp jetken baı tájirıbesin qoldaný kezek kúttirmeıdi. Osy oraıda, aǵa býyn ókilderimen tyǵyz-qarym qatynas ornatyp, qurmetteý bizdiń basty paryzymyz. Sizder osynaý ıgilikti istiń negizgi uıytqysy bolyp tabylasyzdar, – dedi D. Qojamjarova. О́z kezeginde D. Qonaev atyndaǵy Halyqaralyq qorynyń Jambyl oblystyq bólimshesiniń tóraǵasy Amankeldi Qarentaev ulttyq sana qazaqty tutastandyratyn qundylyq ekendigin jáne ol memlekettik ıdeologııanyń, qazirgi qoǵam damýynyń negizgi irgetasy bolatyndyǵyn aıtty. – Rýhanı turǵyda jaqsy tárbıelengen urpaq mindetti túrde elshil, ultjandy azamat bolyp qalyptaspaq. Buny ómirdiń ózi dáleldep otyr. О́tkenniń ulaǵatyn, ulttyq bolmysty, ózindik mádenı qundylyqtardy baǵalaı otyryp, bolashaqty baǵamdaı alamyz, – dedi ol. Sonymen qatar, basqosý barysynda el aǵalary jastarǵa urpaqtar sabaqtastyǵyn saqtaý, rýhanı-adamgershilik qatynastardy damytý, elde bolyp jatqan oqıǵalar jaıynda pikirlerin bildirip, ózderiniń ómirlik tájirıbelerimen bólisti. Oqý ornynyń ónerli stýdentteri daıyndaǵan konsertti tamashalaǵannan keıin qonaqtar kezdesý baǵdarlamasyn sáıkes ınstıtýtta jańadan ashylǵan «Balalardyń sóıleý tilin túzetý men damytýǵa qoldaý kórsetý» men «О́zin-ózi taný» ortalyqtarynda boldy. Sonymen qatar, ardagerler J. Balasaǵun atyndaǵy Túrkistan ólkesiniń tarıhyn zertteý ortalyǵy men «Baýyrjantaný» ǵylymı-zertteý ortalyǵynda atqarylyp jatqan jumystarmen tanysty.