Golovkın: Alvares kishi Chavesti upaı boıynsha jeńedi

Orta salmaqta WBA (Super), IBO, WBC jáne IBF tujyrymdary boıynsha álem chempıony qazaqstandyq Gennadıı Golovkın (36-0, 33 KO) ESPN telearnasyndaǵy «A los golpes» baǵdarlamasyna qatysty. Baǵdarlamada qazaqstandyq boksshy Saýl «Kanelo» Alvares pen kishi Hýlıo Sezar Chaves arasyndaǵy aıqasta kimniń jeńiske jetetini jaıly pikir bildirdi. «Hýlıonyń jeńiske jetkenin qalar edim. Biraq oǵan bul salmaqta Alvareske qarsy turý qıyn bolatyn sııaqty. Al «Kanelo» 164 fýntta judyryqtasyp úırenip qalǵan. Sondyqtan upaı boıynsha jeńedi dep oılaımyn. Biraq ózim kishi Chaveske jankúıerlik etemin», – dedi Golovkın. Qos meksıkalyqtyń arasyndaǵy jekpe-jek 6 mamyr kúni AQSh-tyń Las-Vegas qalasyndaǵy «T-Mobile Arena» arenasynda ótedi. Bir qyzyǵy, eki boksshynyń arasyndaǵy aýyzsha kelisim boıynsha jeńgeni óziniń ǵana emes qarsylasynyń da gonoraryna ıe bolady. «Biz ekeýimiz bul sheshimge kelistik, ári jýrnalıster aldynda naǵyz jigitter sekildi qol alystyq. AQSh-ta aýyzsha kelisimniń ózi resmı bolyp esepteledi degen oıdamyn. Bás tigildi. Ne ol, ne men aqshasyz qaıtamyz», – dedi Alvares.