Djeıkobs: Golovkınniń Alvarespen aldyn-ala kelissózder júrgizýi unamady

Orta salmaqta WBA (Regular) belbeýiniń ıegeri amerıkalyq Dennıel Djeıkobs (32-1, 29 KO) aldaǵy qarsylasy WBA (Super), IBO, WBC jáne IBF tujyrymdary boıynsha álem chempıony Gennadıı Golovkındi (36-0, 33 KO) kezekti ret synǵa aldy. Amerıkalyq boksshyǵa qazaqstandyqtyń aldyn ala Saýl Alvarespen (48-1-1, 34 KO) jekpe-jek jóninde kelissózder júrgizip jatqany unamapty, dep habarlaıdy BoxingScene.com. «Menińshe, bizdiń aıqasymyz ótpeı jatyp, «Kanelomen» boks keshin uıymdastyrý qısynsyz sııaqty. Kelissózder aldyn ala júrgizilgeni durys emes dep oılaımyn», – dedi amerıkalyq boksshy. «Degenmen, onyń mundaı áreketi meni qaıta jeńiske qulshyndyra túsedi. GGG-di jeńý úlken armandarymnyń biri. Árıne, Golovkın óz isiniń sheberi, sondyqtan aramyzdaǵy jekpe-jek jaıly umytyp ketti dep oılamaımyn. Biraq bul áreketi maǵan múldem unamady», – dedi Djeıkobs. Golovkın men Alvares ókilderi boks keshin uıymdastyrý týraly kelissózderdi ótken jyldan beri júrgizilip keledi. Qos tarap áli kúnge deıin qarjy máselesi boıynsha ortaq ymyraǵa kele almaı júr. Qazaqstandyq boksshynyń promoýteri Tom Leffler bul shara osy jyldyń qyrkúıek aıynda ótýi múmkin ekenin aıtqan bolatyn. Aıta keteıik, 18 naýryzda Golovkın AQSh-tyń Madison Square Garden arenasynda Dennıel Djeıkobspen qolǵap túıistiredi. Al Alvares 6 mamyr kúni Las-Vegastaǵy «T-Mobile Arena» arenasynda otandasy kishi Hýlıo Sezar Chavespen sharshy alańǵa shyǵady.