Qyzdar arasynda bokstan Qazaqstan chempıonaty Astanada ótedi

Búgin Qazaqstan boks federasııasy atqarýshy komıtetiniń bıýro otyrysy ótip, onda qyzdar arasynda bokstan el chempıonatyn Astanada ótkizý týraly sheshim qabyldandy, dep habarlaıdy QazAqparat. El chempıonatyn ótkizýge Qyzylorda qalasy da úmitker bolǵan. Degenmen, atqarýshy komıtet músheleri biraýyzdan elordaǵa daýys bergen. Osylaısha qyzdar arasynda bokstan Qazaqstan chempıonaty 3-9 mamyr aralyǵynda «Dáýlet» sport kesheninde ótpek. «Tokıo olımpıadalyq sıkli bastaldy. Al bokstan erlerdiń de, qyzdardyń da quramasy jańaryp, ótkir sporttyq báseke kezeńin bastan keshirýde. Bapkerler barlyq qyzdardyń múmkinshilikterin baǵalap, shyn máninde áleýeti zor sportshylardy tańdap alyp, aldaǵy 4 jyl solarmen júmys isteýi tıis. Demek, bul chempıonat komanda úshin aıqyndaýshy shara bolmaq. Buǵan qosa, taıaý aıdyń ishinde Halyqaralyq olımpıada komıteti Olımpıada oıyndarynda qyzdardyń salmaq sanatyn keńeıtý týraly sheshim qabyldaıdy. Qazirgi ýaqytta bar 51, 60 jáne 75 keli salmaq sanatyna taǵy 57 jáne 69 keli salmaq sanattary qosylady. Sondyqtan biz bul sanattaǵy kóshbasshylardy iriktep alýǵa tıispiz», – dedi bokstan memlekettik jattyqtyrýshy, QBF-nyń elshilik jarystardyń úılestirýshisi Bolat Ábdirahmanov.