Ádilet mınıstrin Parlament bekitedi

Konstıtýsııaǵy engizilgen ózgerister boıynsha Ádilet mınıstrin bekitý jáne qyzmetinen bosatý Parlamentke beriledi. Al Ishki ister mınıstrin taǵaıyndaý jáne qyzmetinen bosatý ókilettigi Prezıdent quzyretinde qalady. «Birinshiden, Ishki ister mınıstri memlekettegi qoǵamdyq qaýipsizdikke, azamattardyń jeke basynyń qaýipsizdigine jaýap beredi. Elbasy - Qazaqstan Respýblıkasynyń Prezıdenti óziniń joǵary mártebeli laýazymyna baılanysty QR Qarýly Kúshteriniń Joǵarǵy Bas Qolbasshysy bolyp sanalady. Al Ishki ister mınıstrliginiń quramynda Ulttyq gvardııa bar.  Ol tikeleı áskerı mekeme. Sondyqtan búgingi tańda Elbasynyń jeke quqymen taǵaıyndalatyn jáne qyzmetinen bosatylatyn Ishki ister mınıstri, Qorǵanys jáne Syrtqy ister mınıstri de osy tártippen qala beredi", dedi Májilis depýtaty, Konstıtýsııalyq reforma jónindegi zań jobasyn ekinshi oqylymǵa daıyndaý jónindegi birlesken komıssııa tóraǵasy Nurlan Ábdirov. Esterińizge sala ketsek, búgin Parlament palatalarynyń birlesken otyrysynda «Qazaqstan Respýblıkasynyń Konstıtýsııasyna ózgerister men tolyqtyrýlar  engizý týraly» QR Zańy qabyldandy.