Kóktemgi egis jumystaryna 21,8 mln gektar jer bólinedi

Búgin Ortalyq kommýnıkasııalar qyzmetiniń resmı ókili Murat Jumanbaıdyń apta saıynǵy brıfıngi ótti. Jıyn barysynda ol Elbasynyń, Parlament pen Úkimettiń, sondaı-aq barlyq ortalyq memlekettik organdardyń qatysýymen ótetin kelesi aptanyń eń mańyzdy is-sharalary týraly habarlady. Sonymen qatar, brıfıngke memlekettik organdardyń baspasóz hatshylary jáne resmı ókilderi qatysty. Aldyńǵy aptada ótken brıfıng barysynda Aýyl sharýashylyǵy mınıstrliginiń qoǵammen baılanys basqarmasynyń basshysy Jasulan Ábdihalyq elimizde bıylǵy kóktemgi egis jumystaryna 21,8 mln. gektar jer bólingenin málimdegen bolatyn. «Jalpy, bıylǵy kóktemgi egis jumystaryna 21,8 mln. gektar jer bólinedi, bul ótken jylmen salystyrǵanda 166 myń gektarǵa kóp», – degen qoǵammen baılanys basqarmasynyń basshysy kóktemgi egis jumystaryna bólinetin janarmaı kólemi ázirge belgisiz ekenin aıtqan. Búgingi brıfıng barysynda Aýyl sharýashylyǵy mınıstrliginiń ókili bıylǵy kóktemgi egis jumystaryn atqarý úshin 375 myń tonna janarmaı bólingenin atap ótti. «Atap aıtqanda, naýryz aıyna – 147 myń, sáýirge – 106,4 myń, mamyrǵa – 118,6 myń jáne maýsymǵa 2 myń tonna janarmaı bólinedi», – dep naqtylady J.Ábdihalyq. Bıylǵy naýryz aıynda kóktemgi egis jumystary úshin dızel otynynyń baǵasy 107 teńgeni quraıdy.