Atambaev parlamentti taratý týraly bastamany qoldady

Qyrǵyzstan prezıdenti Almazbek Atambaev parlamentti taratý týraly bastamany qoldady, dep habarlaıdy QazAqparat KABAR agenttigine silteme jasap. Qyrǵyzstan prezıdentiniń aıtýynsha, ótken aptada parlament otyrysynda «Onýgýý-Progress» fraksııasynyń kóshbasshysy Baqyt Torobaev áriptesterine parlamentti taratý týraly usynys jasaǵan. Qyrǵyzstan basshysy atap ótkendeı, sońǵy kúnderi parlamentte Dachı-Sý  aýylynyń mańynda apatqa ushyraǵan «Boıng-747» ushaǵyndaǵy júktiń Atambaevqa tıesili ekendigi jáne onyń Kıprde offshorlyq múligi bar degen aıyp taǵylýda. «Aıtýlarynsha, borttaǵy júk meniki eken. Olar osy sózderin aıqaılap aıtýda, alaıda ózderi onyń jalǵan ekendigi jaqsy biledi. Eger olar senimdi bolsa, nege Ystanbulǵa nemese Gonkongke baryp, osy aqparatty teksermeıdi jáne aıǵaqtar alyp kelmes pe edi. Álde qıyn ba?», - dedi A.Atambaev. Sonymen qatar, prezıdent Kıprde «onyń mıllıondaǵan qarjysy jatqan esepshoty bar» degen qaýesettiń de osyǵan kelip saıatynyn atap ótti. «Qymbatty depýtattar, qarǵa qarǵanyń kózin shuqymaıdy degen sózdi jaqsy bilesizder. Múmkin, shynymen Torobaevty qoldap, taraısyzdar? Nemese zańdy qurmettep, elimizdiń bolashaǵyn oılaǵylaryńyz kelse, halyq úshin jumys jasańyzdar. Qudaıdan qorqyńyzdar! Eger sizderge shyndyq qajet bolmasa, ol shyndyq halyqqa kerek. Eger sizderge turaqtylyq kerek bolmasa, ol halyqqa qajet!», - dedi Atambaev.